SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 85 - Bokyi Bible

Nshwam eringe nyí Oshê odakyú Kanong

¹ Óburúkpâbí, wo aa/ri banet eyên bafip. Wo aa/chi Ézerel e-chîjá byěm.

² Wo aa/pwoo banet eyên ké byibî, ne ké byěm ebe kángkáng ḿbyí ba*da/man echi*.

³ Wo aa/mîng kafâ esa ne mbé ne a/kám busa-dyityém eyên ḿbú bu/bên bu-shwôm.

⁴ Ô Osówo, Onet-Onyii eten, bwa ne be esim a-mîng kafâ esa ne be.

⁵ Wo a-waa ng ké kafâ esa ne be ne banyá? Kafâ eyên esa kaa*man*?

⁶ Chi bě byi-chîshwane, ne be mú byimu banet eyên byi/chi byi-kye ǒ akpee.

⁷ Ô Óburúkpâbí, tông bě kyijé eyên ńkyí kii*man* a-kye bě ochwâp eyên mú oda bě enyii.

⁸ Me mu n-fwôo ng atông ké ńkyí Osówo Óburúkpâbí mu o-sét ng. Nyǐ mu o-ryí i bě ocím, be mú banet emen o/fu, nyǐ o-kyâ bě bunyîn-dyityém, â be byi*da/chîbwa esim ké enyam-édúú eten*.

⁹ Ké ntûntû, nyǐ oo/kpá byiko ḿbyí odanyii banet ḿbé mbe ba-shî ng ǎ, ne bushú emen ḿbú oda bě enyii bu/chi bu-waa ké esí eten.

¹⁰ Kyijé ne dyityém efé ké Osówo byi/chi byi-kâm barî. Kanong echi ne bunyîn-dyityém byi/chi byi-rwâm barî.

¹¹ Dyityém ńdyí banet mbe ba-fâ ké Osówo dyi/chi dyi-fím ké esí dyi-ribi kyíbóng, ne kanong echi ńké Osówo kyíbóng ka/chi ka-tún achi kyísí.

¹² Óburúkpâbí o/chi o-chi bě byi-já byěm, ne esí eten e/chi e-fé byiryíng.

¹³ Kanong echi ka/chi ka-bwóp Óburúkpâbí kashú ka-da-nap kiǐfáng ka-tî ǎ.