SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 84 - Bokyi Bible

Kyise ńkyí Osówo eryuu

¹ Óburúkpâbí mú o/rêe o-shwôm, kiǐtí-kyise-kyifen eyên echi nkyi kyi-jê ng mě kyi-shwôm.

² Mu n-ryuu ng n/fu, n-kyú u ké nkyí. Mu n-ryuu ng n/fu, n-kyú u ké kiǐtí-kyise-kyifen-Óburúkpâbí echi. Me mu n-kwán n ekwan ne kyirim-enyam-byiko ejí ké bunyîn-dyityém n-kyâ Osówo mú mu ne dyikpen.

³ Nang efyife e-chi i aju. Nang agbâng nyi ne byise ḿbyí ebe. Nyǐ nyi a-tî ng bwǎn ebe fáráng ne kyikit ńkyí badachi kyifen eyên, ǎ Óburúkpâbí mú o/rêe o-shwôm, mú mu Otu ejí ne Osówo ejí.

⁴ Bunyîn-dyityém bu/jê banet ḿbé mbe ba-kyú u ké kiǐtí-kyise-kyifen eyên echi. Mbé kángkáng nkéré mbe ba-kwán n ekwan-akpee ba-kyâ ǒ.

⁵ Bunyîn-dyityém bu/jê banet ḿbé busa ebe mbu bu-fím m ké abwô eyên. Bunyîn-dyityém bu/jê banet ḿbé mbe ba-ryuu ng ba/fu, mbé ba-câ kaku ńké Záyon.

⁶ Ké nkéré mú mbé ba-kú ba-shwôm m kiǐyéyé-owo ńkyí Báka, kyikit ánkyi kyi-firi kyikit ńkyí boǒbwán-buce budabyí ne [baǎmú-dyije] badasú ké nkyí.

⁷ Eringe nyí mbé mbe ba-câ, mbe ba-shwane e ba-câ kashú. Mbé ba/chi ba-ri Osówo ké Záyon mú mu Osówo mú esówo kángkáng.

⁸ Osówo Óburúkpâbí mú o/rêe o-shwôm, jwo nshwam ejí. Osówo mú Jekôp, jwo mě.

⁹ Osówo, jware otu eten, otu eten mú wo a/cá.

¹⁰ Dyicí dyibónge ekyú ké kiǐtí-kyise-kyifen eyên echi dyi/shwôm égot-ací ekyú ké kyikit kyikíri. Nkyi mě kanong ńkyí ndakyú ké ocím-dyifyi mú kyise-Osówo ejí kyi-shwôm ńkyí ndakyú ké kafâ-byise ḿbyí byibî-banet.

¹¹ Óburúkpâbí nké mu Onet-Onyii eten ne Otu eten mú kiǐtí, mú mu o-tông ng bě dyityém ecángê ne ofê. Nyǐ oo*né banet ḿbé mbe ba-chi i kanong chwǒm ńkyí kyinong ekye*.

¹² Óburúkpâbí mú o/rêe o-shwôm, bunyîn-dyityém mbu ne banet ḿbé mbe ba-tî ng atyém ké wo.