SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 83 - Bokyi Bible

Nshwam mú eringe nyí Osówo odakpógê Banet-Bushwôn ḿbé Ézerel

¹ Ô Osówo, *dacíbî pyêp*. *Dawaa cip*. *Dawaa pyêp*.

² Kûri, banet-bushwôn eyên ba/bírî bunwa ne wo, ne banet ḿbé wo amu a-sa ng kámbé kafâ ba-kú ba-bírî ng bunwa ne wo.

³ Mbé mbe ba-nam m ké kadip kyi-kim ne banet eyên. Mbé mbe ba-nam m banet ḿbé wo amu a-ku ng.

⁴ Mbé mbe ba-raa ng ne barî ba/fu, bâ n̂g byi-bên oshê ebe eringe nyí badaráp kyi-kim ne Ézerel ne banyá.

⁵ Mbé ba/bángê ké ńkyí ba/nam, ba-ryí barî ocím mú badacibi ba-nwa ne wo.

⁶ Ányi banet ḿbé Édom ne ḿbé Éshimal, ne ḿbé Mówep ne ḿbé Héga,

⁷ ne ḿbé Gébal ne ḿbé Ámon ne ḿbé Amálek ne ḿbé Fyilíta ne ḿbé Táya.

⁸ Oshê-Asyírya mú odakán byití ba/cibi to ne bwǎn-Lôt.

⁹ Chi kámbé ńkyí a/chi banet ḿbé Médyan ne ńkyí a/chi onet mú odabángê Sisárá ne Otu Jábyin ké kace ńké Kyíshon.

¹⁰ Wo a/kpógê kámbé ké Ndo, ne enyam-byiko ebe e/fwoo kyísí.

¹¹ Chi batu-ashí ebe ńkyí a/chi Otu Órep ne Otu Zêp. Kpógê banet-ashí ebe kángkáng wǎ eringe nyí a/chi Otu Zéba ne Otu Zamúna,

¹² ḿbé ba/fu, be byi/chi byi-kúng esí nyí e/já Osówo e-firi nyí eten.

¹³ Ô Osówo, chi kámbé ba-firi byiryibyiryi wǎ édúkǎndú, ba-firi wǎ biǐbyâa ḿbyí bufú mbu bu-tugi ng bu-pwó ng.

¹⁴ Wǎ eringe nyí okwâ odashí dyikán, ne wǎ eringe nyí bumang-okwâ budachi eku e-firi ké kafâ-okwâ,

¹⁵ éné to nké wo adaró kámbé, bushî bu-róng kámbé ne kyibî-afú eyên.

¹⁶ Ô Óburúkpâbí, wuri kámbé éshwân chwóó a-chi kámbé to ba-nyît busa eyên.

¹⁷ Kyi/bát bakpógê kámbé ba-waa ké bushî ne banyá. Kyi/bát bakpú ké éshwân.

¹⁸ Kyi/bát mbé banyît ba/fu, wo kǎnchí nké amu Óburúkpâbí mú mu Otu-Dyishí mú ejíí emúmú, mú o/rêe o-shwôm.