SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 81 - Bokyi Bible

Okwan mú Dyijî-Kyifen echi

¹ Wonge ê ne ejá kyíbóng kyíbóng ba-kye Osówo mú mu busa eten. Kwán n̂ akpee ba-kye Osówo mú Jekôp.

² Kpet n̂g ane ekim, ba-só byícícágé. Kim m̂ ane nyí bunyîn-dyityém ké égûm ne ácîng ekim.

³ Jwá n̂g kiintán ńkyí dyijî-kyifen ké nkéré-otukáku mú ofyîfî odabyí, ne ké nkéré oo/kwárê.

⁴ Nyín kyije ńkyí nkyi ké Ézerel, ńkyí nkyi busa ḿbú bu/fím ne Osówo mú Jekôp.

⁵ Nyǐ o/kye banet-Ézerel kánkyí [ké nkéré nyǐ o/nwa ne banet ḿbé Éjip.] Me n/jwo ejá nyí me nn*nyît* e-raa e/fu,

⁶ me n/shû běn atû nyí ba/mû ba/tû běn. Me m/mîng běn ba-shû byirim-ecing enen ba-tî kyísí.

⁷ Ben ba/kó mě n-nyii běn ké nkéré ben ba/mû ké afaníkong. Me n/faa běn ojá ké kyikit-orem ejí, ké afú nyí aryên. Me n/kan běn ké kace ńké ka/byí ké mbwo, ké Meryíba.

⁸ Banet ejí, fwôo n̂g atông ba-jwo ekó ejí nyí mu n-kuri ng. Banet-Ézerel, me mu n-ryuu ng kanong kanong n/fu, fwôo n̂g atông ba-jwo mě.

⁹ Ben baa*man ba-kye osówo okíri ofê*.

¹⁰ Me n-chi i Osówo Óburúkpâbí enen mú o/fîm běn ba-byí ba-mîng esí nyí Éjip. Bâa n̂g ocím enen, ne me n/chi n-nen běn.

¹¹ Nké banet ejí ba*da mě ejwo*. Banet-Ézerel ba*da/chi ńkyí me n/sét*.

¹² Ké bubwô ámbu, me m/mîng kámbé n/fu, baca ne édúú ebe nyí atyém erêe, ba-chi ńkyí mbé mbe ba-ryuu ng.

¹³ Â a/ri eringe nyí me mu n-ryuu ng n/fu, banet ejí bajwo mě. Â a/ri eringe nyí me mu n-ryuu ng n/fu, bachi ńkyí n/sét.

¹⁴ Me m/mû m-kpógê ng banet-bushwôn ebe babap, ne m/mû m-kpógê ng kángkáng banet-ociring ebe.

¹⁵ Banet ḿbé mu n-sa ng kámbé kafâ ba/mû ba-tíngê e kyísí ké bushú ejí ké bushî. Busông ebe bu/mû bu-waa ng ne banyá.

¹⁶ Nké me m/mû n-nen n běn ne esang-byichí nyí e/nwa e-shwôm, ne m/mû n-kyâ běn bakút-bukwan ba-ryí i ba-zût ng.