SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 79 - Bokyi Bible

Nshwam mú Onyii mú Oshê

¹ Ô Osówo banet ḿbé ba/bángê ké bakye esháng baa/koo esí eyên. Mbé ké kyibî-omiríng ebe baa/bên kiǐtí-kyise-kyifen eyên echi ńkyí ociring, ne baa/shí Jerúsélem kángkáng.

² Ba-mîng byikwóm-enyam-byiko ḿbyí banet eyên ba/fu, biinfuu akun byiryí, ne ḿbyí bǎmgbán eyên ba/fu, byibî-enyam byiryí.

³ Mbé ba/pwó baróng ḿbé banet eyên wǎ omu. Baróng ba/sen wǎ omu ké Jerúsélem omúmú, onet nang obónge o*da/waa mú odaryii ḿbé baa/kpú*.

⁴ Eshê nyí nyi bě wângwâng nyi e-dángê e bě. Nyǐ nyi e-jwó ng bě, ne nyi e-fát ng bě kiikuku.

⁵ Óburúkpâbí, wo a-waa ng ké kafâ esa ne be ne banyá? Kafâ esa eyên ka/chi ka-mang ka-ca kashú wǎ okwâ?

⁶ Bírî busa-dyityém eyên bu-kâm eshê nyí e*fí e-kyâ ǒ ofê* bu-kâm banet ḿbé ba*fí ba-fâ nshwam ba-kyâ ǒ*.

⁷ Ké nǎ, mbé baa/ju banet eyên, ba-bên oshê eyên.

⁸ *Da bě ekye busông ké bubwô-byibî ḿbyí banchí eten ḿbé kpákpá*. Ri bě bafip kántîk, ké nǎ, be baa/bwa ne be kyísí kyísí.

⁹ Chwáp bě, ǎ Osówo, a-nyii bě. Nyángê bě a-pwoo bě byibî eten ké bubwô ḿbú dyizîn eyên.

¹⁰ Kyi/cen nǎ ńkyí banet ḿbé ba/bángê ké bakye esháng bada bě ebí ba/fu, Osówo enen mu nyá. Mîng bě byi-ri ǒ a-kye banet ámbe busông ké bubwô-baróng ḿbé mbé ba/chi ba-byí bǎmgbán eyên.

¹¹ Fwôo atông a-jwo dyibyê ńdyí banet-bamgbokobá, ne ké kiǐtí-busa eyên, chi banet ḿbé ba/fu, bashwân kámbé, ba-fem.

¹² Óburúkpâbí, só eshê nyí áku ewa kampén bujam ké kángkáng ecábé nyí mbé baa/kye ǒ.

¹³ Ne be kâng mú byimu banet eyên ḿbé dyibóng-ebû eyên byi/chi byi-kó ǒ asǎma ne banyá, byi-kye ǒ akpee ké kángkáng nkéré mú mu o-bâ.