SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 78 - Bokyi Bible

Osówo ne Banet Emen

¹ Banet ejí, fwôo n̂g atông ba-jwo ńkyí mu n-tángê e. Tî n̂g atông ké ńkyí mu n-sét ng.

² Me n/chi n-kwán ekwan-atím-ekan, ne n/chi n-sét dyishí ne kyikû-byěm-akat kyi-fím ké nkéré mú o/shwôm ké esim,

³ ne byěm ḿbyí be bii/jwo ne ḿbyí bii/nyît ne ḿbyí banchí eten ba/sét bě.

⁴ Be bii*ba/chi byi-né bwǎn eten esét kámbyí*. Be byi/chi byi-sét bwǎn ḿbé ba/chi ba-fwon kyi-kim ne busa ḿbú Óburúkpâbí ne biǐtí-byěm emen echi ne akat-byěm nyí nyǐ oo/chi.

⁵ Nyǐ o/kye banet-Ézerel ḿbé mbe bwǎn-Jekôp byije. Nyǐ o/sét banchí eten ḿbé kpákpá o/fu, batángê bwǎn ebe byije emen,

⁶ eringe nyí bwǎn ḿbé ba/chi ba-fwon ba/chi ba-kwâa kámbyí, ne mbé to ba-bwa ba-sét bwǎn ḿbé ebe kámbyí.

⁷ Ké bukwóp ḿbún, mbé to ba/chi ba-fé dyityém ké Osówo ne baa*ráp ńkyí nyǐ oo/chi* nké mbé kángkáng nkéré ba/chi ba-chi wǎ eringe byije emen byi/sét.

⁸ Mbé baa*ba/chi ba-kyú wǎ banchí ebe ḿbé kpákpá* ḿbé ba/mû ba/bírî ba-nwa ne Osówo* ne banet ḿbé baa*chi ńkyí Osówo o/sét* ne dyityém ebe ńdyí ba/fé ké Osówo dyi/mû dyi*fí shwanshwan* ne ba*da/waa ké dyityém efé ne nyǐ*.

⁹ Banet ḿbé Éferem, ḿbé ba/kám báre ne abán ba/chêe ké dyicí-byití.

¹⁰ Mbé ba*da/tî ocím ebe mú mbé ba/ryí ne Osówo ba-sem dyizîn emen*. Mbé ba/né echi wǎ eringe byije emen byi/sét.

¹¹ Mbé ba/ráp ńkyí nyǐ oo/chi ne biǐtí-akat ḿbyí mbé ba/ri ǎ o-chi.

¹² Ké nkéré banchí ebe ḿbé kpákpá mbe ba-tún n achi, Osówo o/chi biǐtí-akat ké ndíp-kyikit mú Zôn, ké Éjip.

¹³ Nyǐ o/kyii baya ḿbé baryên ne o-yip kámbé ba-shwôm ké mbé. Nyǐ o/chi omu mú baya ámbe o-bwom wǎ ekpe.

¹⁴ Nyǐ o/kúng ófíbí o-sí kámbé ne esû, ne o-kúng bumang-okwâ o-sí kámbé buchú bumúmú.

¹⁵ Nyǐ o/sé aká ké kyikim-dyikán o-kye kámbé omu mú mu o-fím m ké kafâ-esí.

¹⁶ Nyǐ o/chi kaǎwán-kace ka-byí ké buká ne o-chi omu emen o-sen wǎ kace ńké karyên.

¹⁷ Nké mbé ba/chi byibî ba-ca kashú ba-bât Osówo, ne ké kyikim-dyikán, mbé ba/bírî bunwa ne nyǐ mú mu kyíbóng kyíbóng.

¹⁸ Mbé ba/tigi Osówo ekan ké byiryíng ebí ḿbyí mbé ba/mû ba-ryuu ng.

¹⁹ Mbé ba/raa byiraa ba-bât Osówo ba/fu, Osówo o-man n ejá byiryíng ḿbyí odakye kámbé ké kyikim-dyikán?

²⁰ Ńkyí nyǐ o/sé buká ne omu o-tím puupuu nkyi ntûntû, nké nyǐ o-man n bě ekye to berêt? o-kye banet emen enyam?

²¹ Ne ké bubwô ámbu, kafâ ka/sa Óburúkpâbí ké nkéré o/jwo kámbé. Nyǐ o/rim bunwa ne mbé, ne bumang-okwâ ne kafâ emen esa ne mbé ka-jê ojéng.

²² Ké nǎ, mbé ba*da/fé dyityém ne nyǐ* ne ba*da/bángê ba/fu, nyǐ o-nyii ng kámbé*.

²³ Nké nyǐ o/raa ne bubóng, ne o-kye busa o/fu, afyi nyí bubóng abâa.

²⁴ Ne nyǐ o-kye kámbé esang-byichí nyí e/fím kyíbóng ké berêt mú badakó mána, mú o/twóm kámbé o/fu, baryí.

²⁵ Ne mbé kâng ba-ryí byiryíng ḿbyí barím ḿbé banong, ne Osówo o/kye kámbé kángkáng byěm ḿbyí ba/mû ba-ryuu ng.

²⁶ Nyǐ to o/chi bufú ḿbú bu/fím kyicê ńkyí óbyísû odabyí bu-kpet etugi, ne ké busa emen o/tông bufú ḿbú busyísen kiǐfáng,

²⁷ ne nyǐ o/twóm bunurung ḿbú bu/jê wǎ éshíshě nyí nyi ké bukô-kace bu-kâm banet emen.

²⁸ Mbú bu/róng ké otyém mú bampyep ebe ḿbé badabi ké kyídí bu-wáp byikit byimúmú ḿbyí ba/mû ba-kyú u.

²⁹ Ne banet kâng ba-ryí ba-zût. Osówo o/kye kámbé ńkyí mbé ba/mû ba-ryuu ng.

³⁰ Nké mbé ba/mû ba*da/zût ne* ké ńkyí mbé ba/mû ba-bí ng* ne ba/mû ba/tôong ba-ryí i kámbú,

³¹ ké nkéré kafâ ka/bírî Osówo ne mbé, ne o-ju banet ebe ḿbé ba/mû banet-busa, ne ba/mû byisu-banyinchéng ḿbé ba/nwa ba-shwôm ké Ézerel.

³² Nang ké Osówo o/chi byěm ḿbyín kángkáng, banet ba*da/mîng byibî echi*. Nang ké biǐtí-akat emen, mbé ba*da/tî dyityém ké nyǐ*.

³³ Ké bubwô ámbu, nyǐ o/chi ací ebe a-man wǎ kiǐnjáng ne akpen ebe wǎ kiǐmút-bukyû.

³⁴ Nang nkéré orá nké nyǐ o/ju kyicê-banet ebe, burwám ḿbú áku bu-bírî ng bu-kâm, byiko byi-kpú kámbé, ba-fé nshwam ne dyityém ebe ba-kye ǎ.

³⁵ Mbé ba/zîim ba/fu, Osówo mu o-ku ng kámbé, Osówo mú mu kyíbóng kyíbóng o/bê echwáp kámbé.

³⁶ Nké byiraa ebe byi/mû byisédéng byísedeng. Chwǒm kyi*fí nang kyibónge ńkyí mbé ba/raa ńkyí kyi/mû ntûntû*.

³⁷ Mbé ba/mû ba*da/tî dyityém ebe ne nyǐ*. Mbé ba/mû ba*da/fé dyityém ké ocím ebe mú mbé ba/ryí ne nyǐ ba-sem ǎ*.

³⁸ Nké Osówo o/mû o/ri banet emen bafip. Nyǐ o/pwoo kámbé byibî ebe, ne o*da/ju kámbé*. Nyǐ o/kám dyityém emen esa kampén kampén ne o*da/buu kafâ emen kángkáng*.

³⁹ Nyǐ o/zîim o/fu, mbé ba-chi i banet ne enyam-byiko nké nke nyí edakpú wǎ bufú ḿbú mbu bu-tugi ng, ne bu-man n ké kaǎnyín-nkéré.

⁴⁰ Mbé ba/bírî bunwa ne nyǐ kampén kampén ké kyikim-dyikán. Ba/chi ǎ o-kyú ké bafip kampén kampén.

⁴¹ Mbé ba/kan Osówo kampén kampén ba-bírî ng, ne ba/chi ka-sa Osówo mú Ézerel mú o/nwa o-shwôm.

⁴² Mbé ba/ráp kiǐtí-busa emen ne dyicí ńdyí nyǐ o/nyii kámbé ké abwô nyí banet-bushwôn ebe,

⁴³ ne nkéré mú nyǐ o/chi biǐtí-byěm ne biǐtí-akat ké ndíp-kyikit mú Zôn, ké Éjip.

⁴⁴ Nyǐ o/yángê buce bu-bírî baróng bárong, ne banet-Éjip ba*da/chîjá omu mú badajwáp*.

⁴⁵ O-twóm ecincing e-kâm kámbé nyí e/kye kámbé afaníkong, ne búsáng ḿbú bu/bên kámbé esí.

⁴⁶ O-twóm agurubí o/fu, aba-ryí byíkwôn ebe a-bên byifát ebe,

⁴⁷ o-ju byíkwôn ebe ké abíp ne o-chi byichí ebe byi-fwoo byi-kpú,

⁴⁸ o-ju byitú ebe ké [abíp ne enyam ebe ké kasabang.]

⁴⁹ Nyǐ o/chi kámbé ba-ri busông ḿbú kiǐtí ké kyibî-kafâ ńké nyǐ o/sa, ńké ka/bê wǎ bambánge byitwóm ḿbé bukyû.

⁵⁰ Nyǐ o*da/kám kafâ emen esa* o-zú nang akpen ebe abwô*. Nké o/ju kámbé ké busông,

⁵¹ o-ju bákpá-banyinchéng ké kángkáng byikû-banet ḿbyí banet-Éjip.

⁵² Ne nyǐ o-kúng banet emen wǎ mbâm ebú o-byí ne mbé, ne o-bám kámbé ké kafâ-kyikim-dyikán.

⁵³ Nyǐ o/sí kámbé afaníkong a*fí* ne mbé ba/mû ba*fí ba-shî ng*. Nké baya ḿbé baryên ba/kpaa banet-bushwôn ebe ba-cít.

⁵⁴ Nyǐ o/bê ne mbé ké esí-ociring emen ké eku nyí nyǐ oyén o/kpógê.

⁵⁵ Nyǐ o/ró bayén-esí ké nkéré mú banet emen mbe ba-tín n ba-bâ. O-kyii esí ebe o-kye byikû-banet ḿbyí Ézerel, o-kúng byise ebe o-kye banet emen.

⁵⁶ Nké banet emen ba/bírî bunwa ne Osówo mú mu kyíbóng kyíbóng, ba-kan ǎ. Ba*da/chi eringe nyí byije emen byi/sét*

⁵⁷ nké ba/bírî bunwa ne nyǐ, ba*da/tî dyityém ebe ne nyǐ* wǎ banchí ebe, wǎ dyibán ńdyí ndyi nyibínyibinyibí.

⁵⁸ Mbé ba/chi kafâ ka-sa ǎ ké bubwô-byikit ebe ḿbyí bakye esháng, ne ba-chi ka-bírî ǎ ka-shwôm ké nkéré o/ri erím-bakye ebe.

⁵⁹ Ka/sa Osówo ké nkéré o/ri kánkyí. Ké bubwô ámbu, nyǐ o/né banet emen kángkáng.

⁶⁰ O-dim o-mîng mpyep-kyifen emen echi mú badabi ké kyídí, ké Shîl, ké kyise ńkyí nyǐ o/mû oo/kyú ne mbé.

⁶¹ Nyǐ o/mîng banet-bushwôn ebe ba-bam kámbé mkpukpu-byěm emen ba-koo, mú mu ekap nyí busa emen ne busan emen ḿbú ragerage.

⁶² Kafâ ka/mû ka-sa ng ǎ ne banet emen, ne nyǐ o-mîng banet-bushwôn ebe ba-ju kámbé.

⁶³ Ba-ju byisu-banyinchéng ké byití ne byisu-banyinyi ba-waa, onet mú odabé kámbé o*fí*.

⁶⁴ Ba-ju banchi kyifen-Osówo ké kashwám ne banet ba*da/bángê banyǐnkú ebe ba-ta dyikán*.

⁶⁵ Ké nkuli kyikû, Óburúkpâbí o-bûu éné wǎ o/jwóbê ké burê. Nyǐ o/mû wǎ okân-onet mú bato mbe ba-chi i ǎ o-bûu ne busa.

⁶⁶ O-nwa ne banet-bushwôn emen ba-bwa esim ké nkuli kyikû-dyikpóge ńdyí éshwân.

⁶⁷ Nké nyǐ o/né bwǎn ḿbé Josêf. O*da/cá kyikû-banet ńkyí Éferem*.

⁶⁸ Nké o/bwa o-cá ńkyí Júda ne kaku ńké Záyon, ńké nke ka-jê ng ǎ kanong kanong.

⁶⁹ Ányi nké nyǐ o/bi kiǐtí-kyise-kyifen emen echi wǎ kyise emen ńkyí nkyi kyíbóng. Nyǐ o/chi kánkyí kyi-shwane wǎ esí eyén, kíngkíng ne banyá.

⁷⁰ Nyǐ o/cá Otu Dívit mú ḿgbán emen o-fîm ǎ ké bǎmkpóngé emen

⁷¹ ḿbé o/mû o-nen n ebû emen, ne o-kúng ǎ butu ḿbú Ézerel, o-kyú wǎ mbâm ebû mú banet emen.

⁷² Otu Dívit o-tún kámbé ne dyityém ńdyí dyinong, o-tông kámbé bukwóp ne bubwô-bǎmkpóngé ḿbú bunong.