SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 77 - Bokyi Bible

Dyityém efé ké Nkéré-Afaníkong

¹ Me mu n-tii ng Osówo bukyû ne ejá kyíbóng kyíbóng. Me mu n-tii ng ne ejá kyíbóng kyíbóng, [ne nyǐ mu o-jwo ng mě.]

² Me mu n-fâ nshwam n-kyâ Óburúkpâbí ké nkéré-afaníkong. Me mu m-bêem m abwô kyíbóng ké nshwam efé buchú bumúmú, nké dyityém ejí dyi*fí dyi-ri ng bunyîn-dyityém*.

³ Ké nkéré n-kú n-kabe ng kyi-kim ne Osówo, me mu n-tii ng. Asa a-man n mě ké nkéré n-kú n-kabe ng.

⁴ Nyǐ mu o-tî ng mě achi fúú buchú bumúmú. Me ofong mu o-két ng mě mú mm*man eraa*.

⁵ Me mu n-kabe ng kyi-kim ne ací nyí a/shwôm ké esim ne mu n-zîim m aje nyí a/shwôm ké esim chwóó.

⁶ Me mu n-kyú u buchú bumúmú [n-kabe ng,] ńkyín něen nké n/kabe m-bí byiko ejí n/fu,

⁷ Óburúkpâbí o/chi o-né bě kángkáng nkéré? Kii*ba/chi kyi-chî ǎ enyîn ne be ne banyá*?

⁸ Be bii/mîng ǎ ejê? Ocím emen mú o/ryí o*fí to*?

⁹ Osówo oo/ráp banet bafip eri? Kafâ esa kaa/kúng kyikit ńkyí banet bada ǎ ekpú byiko? [

¹⁰ Ne n-raa kâng n/fu, ńkyí nkyi kyi-bán n mě kyi-shwôm nkyi něen, n/fu, Osówo o*fí to ne busa*.]

¹¹ Óburúkpâbí, me n/chi n-zîim biǐtí-byěm eyên ḿbyí amu a-chi i. Me n/chi n-zîim m biǐtí-byěm-akat eyên ḿbyí a/chi ké nkéré mú o/shwôm ké esim.

¹² Me n/chi n-kabe kyi-kim ne kángkáng byěm ḿbyí wo aa/chi. Me n/chi n-kabe kyi-kim ne biǐtí-byěm eyên ḿbyí amu a-chi i.

¹³ Ô Osówo, kángkáng byěm ḿbyí amu a-chi i mbyi kanong. Osówo o*fí mú o/rêe wǎ wo*.

¹⁴ Wo amu Osówo mú mu o-chi i biǐtí-akat. Wo amu a-tông ng eshê nyí ee*nyît ǒ* busa eyên.

¹⁵ Wo a/nyii bwǎn ḿbé Jekôp ne ḿbé Josêf, ḿbé mbe banet eyên.

¹⁶ Ô Osówo, ké nkéré baya ḿbé baryên ba/ri ǒ, bushî bu/róng kámbé, byirí byi-náng.

¹⁷ Ófíbí o/na omu, etare e/sá ké bubóng, ne kasabang ka/kédê byicê byimúmú.

¹⁸ Etare eyên e/sá, ne kasabang eyên ka/kye ejíí kiinwángé. Esí e/só banê e-náng.

¹⁹ Wo a/cen a-shwôm ké baya ḿbé baryên. Wo a/nyáng baya ḿbé ba/ríbî, nké ba*da/man eri abe-byiká eyên nyí a/cím*.

²⁰ Wo a/sí banet eyên wǎ mbâm ebû, ne Músis ne Éron ba/mû kámbé banet-ashí.