SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 76 - Bokyi Bible

Osówo Mkpóge Byití

¹ Mbe ba-nyît ng Osówo ké Júda. Mbe ba-kyâ dyizîn emen ofê ké Ézerel.

² Nyǐ o/bi kyise emen ké Jerúsélem, ké kaku ńké Záyon.

³ Ányi nké o/bún abán nyí banet-bushwôn emen ne édem ebe ne bushwám ebe ne kángkáng byiyám ebe.

⁴ Ô Osówo, busa eyên boo*nwa eri*. Butu eyên ké nkéré a-kú a-fím m ké eku, ké kyikit ńkyí a/kpógê banet-ociring eyên a-fyi, boo*nwa eri*.

⁵ Bakân-bannwa byití ebe baa/koo kámbé byěm kángkáng, ne mbé kántîk mbe ba-rê ng burê-bukyû. Busa ebe kángkáng ne byinyídíng ebe byi*da/byí chwǒm*.

⁶ Ô Osówo mú Jekôp, ké nkéré a/raa ne mbé, bubyî-orá ne banet ḿbé mbe ba-yú u kámbú ba/myii ba-kpú.

⁷ Nké Óburúkpâbí, wo kángkáng banet mbe ba-shî ng ǒ. Onet o*fí nang obónge mú odaman ebwom ké bushú eyên ké nkéré ka-kú ka-sa ng ǒ*.

⁸ Wo a/bwom áku kyíbóng a-chi ejíí e-nyît mpan eyên mú a/két. Bushî bu/róng ejíí ne e/cíbî pyêp,

⁹ ké nkéré a/bûu a/fu, a-két ng mpan eringe adanyii kángkáng banet ḿbé mbe ba-cít ng kámbé ké ejíí. [

¹⁰ Ké ntûntû, dyityém esa ńdyí banet-bushwôn eyên byi/chi dyi-chi banet ba-kye ǒ akpee. Banet ḿbé ba/fem ké byití ba/chi ba-tî ajî-byifen eyên.]

¹¹ Kye n̂g Osówo Óburúkpâbí enen ńkyí ben ba/ryí ǎ ocím. Ben eshê kángkáng nyí nyi ǎ fáráng, bâ n̂g ǎ ne eyáré. Osówo mu o-chi i banet ba-shî ǎ.

¹² Mu o-shû ng banet-ashí ḿbé mbe ba-tông ng byiko ba-bwa kyísí, ne mu o-chi i biǐtí-batu ba-firi ké bushî.