SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 72 - Bokyi Bible

Nshwam efé ké Bubwô-Otu

¹ Ô Osówo, tángê otu eringe odakúng kanong eyên o-kûpan banet bampan. Kyii ntûntû eyên a-kye ǎ

² eringe nyǐ odakúng ntûntû o-kûtún banet eyên, o-kúng to kanong echi o-kûtún banet ḿbé baa/kúng kámbé wǎ básóng.

³ Kyi/bát esí enwa byiryíng. Kyi/bát esí eri kanong eyên.

⁴ Kyi/bát otu okûpan banet-kyikpu mpan ké bukwóp ḿbú bunong. Kyi/bát otu ochwáp banet ḿbé ba*fí ne chwǒm* o-kpógê banet ḿbé mbe ba-cít ng kámbé. [

⁵ Kyi/bát banet eyên bakye ǒ ofê] tete óbyísû o-mîng ebyí, tete otukáku o-mîng esan ké nkéré mú mu o-bâ.

⁶ Kyi/bát otu okyú banet emen wǎ omu mú odana o-pwôo ng ké byifát. Kyi/bát okyú wǎ kyibû ńkyí nkyi kyi-na ng kyi-pwôo ng ké esí.

⁷ Kyi/bát kanong echi kabâ ké nkéré mú nyǐ o/tôong okpó, ne kyi/bát bunyîn-dyityém buwaa tete otukáku o-mîng esan.

⁸ Butu emen bu/chi bu-jê bu-fím ké baya babónge bu-ribi ké ḿbé áku, bu-fím ké bukô-ejíí ḿbú áku bu-ribi ḿbú kwán.

⁹ Banet ḿbé mbe ba-kyú u ké kyikim-dyikán ba/chi ba-tíngê kyísí ké bushú emen ba-fé ǎ. Banet-bushwôn emen ba/chi ba-myii kyísí.

¹⁰ Batu ḿbé Syipîn ne ḿbé eshê nyí baya ba/wáp kányí ba-fé ké kafâ ba/chi ba-kye ǎ eyáré. Batu ḿbé Arébya ne ḿbé Etyǒpya ba/chi ba-bâ ǎ ne eyáré.

¹¹ Kángkáng batu ba/chi ba-tíngê kyísí ba-fé ǎ. Kángkáng eshê e/chi e-chi ńkyí nyǐ o/sét.

¹² Nyǐ mu o-nyii ng banet-kyikpu ḿbé mbe ba-kó ng dyizîn emen ne banet ḿbé ba*fí ne chwǒm* ne ḿbé baa/né kámbé.

¹³ Nyǐ mu o-ri ng banet-kyikpu bafip ne ḿbé asa a*fí kámbé*. Nyǐ mu o-nyii ng dyikpen ńdyí banet ḿbé ba*fí ne chwǒm*.

¹⁴ Nyǐ mu o-nyii ng kámbé ké afaníkong ne ké abwô nyí banet ḿbé mbe ba-cít ng kámbé. Akpen ebe nyi ǎ kiǐtí.

¹⁵ Otu okpen o-wu. Kyi/bát banet ḿbé Arébya bakye ǎ akpuga. Kyi/bát banet bafé nshwam ba-kye Osówo ké dyishí emen kángkáng nkéré. Kyi/bát Osówo ojware ǎ kángkáng nkéré.

¹⁶ Kyi/bát byiryíng byijê ké esí eten. Kyi/bát byíkwôn byisú ké eku eten, byi-chi byirim wǎ ḿbyí ké esí nyí Lebánon. Kyi/bát eshê eten esú ne banet wǎ biǐbyâa ḿbyí ké byifát.

¹⁷ Kyi/bát dyizîn ńdyí otu dyiwaa ne banyá. Kyi/bát kanong emen kawaa tete óbyísû o-mîng ebyí. Kyi/bát eshê kángkáng ekye ǎ akpee. Kyi/bát ebí Osówo o-kye kányí ojware, [ne kyi/bát eryuu otu o-kyú ké bunyîn-dyityém.]

¹⁸ Kye n̂g Osówo Óburúkpâbí mú Ézerel akpee. Nyǐ kǎnchí nké mu o-chi i biǐtí-byěm ḿbyín.

¹⁹ Kye n̂g kiǐtí-dyizîn emen akpee nyí ne banyá. Kyi/bát busa emen busú ké ejíí emúmú. Kyi/bát kyikyú éné kerededet.

²⁰ Nyín nkuli kyikû-banshwam ḿbé Otu Dívit mú wǎn-Jésyi.