SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 68 - Bokyi Bible

Okwan mú Oshê o/kpógê Byití

¹ Osówo mu o-bûu ng nensang o-chi banet-bushwôn emen ba-firi byiryibyiryi. Banet ḿbé nyǐ mu o-sa ng kámbé kafâ ba-chêe ng ké bushú emen.

² Nyǐ mu o-ró ng kámbé ba-byí i wǎ eringe nyí bufú budatugi arúkwâ. Bambên atyém ba-rím m ké bushú-Osówo wǎ eringe nyí burwan budanyange ké okwâ.

³ Nké banchi kanong mbe ké bunyîn-dyityém, ne mbe ba-jêe ng ké bushú emen. Mbé mbe ké bunyîn-dyityém, ne mbe ba-jêe ng ne ejá kyíbóng kyíbóng.

⁴ Kwán n̂ ekwan ba-kye Osówo. Kwán n̂ ekwan-akpee ba-kye dyizîn emen. Chi n̂g kiǐfáng ba-tî ǎ nyǐ mú mu o-yú u [ké éfíbí.] Dyizîn emen dyi-bángê e Óburúkpâbí. Kyú n̂g ké bunyîn-dyityém ké bushú emen.

⁵ Osówo mú mu o-kyú u ké kyise emen ńkyí ociring mu o-tún n bwǎn-byibén, ne mu o-ku ng banyǐnkú ké afaníkong.

⁶ Nyǐ mu o-kyâ banet ḿbé ba*fí ne onet* kyise ńkyí badakyú, ne mu o-sí ng bamgbokobá ba-firi ké byiko ebe ne bunyîn-dyityém. Nké bambíri bunwa ne nyǐ ba-man ba-kyú ké kyibî-esí.

⁷ Ô Osówo, ké nkéré a/sí banet eyên, ne ké nkéré a/cen a-nyáng kyikim-dyikán,

⁸ esí e/náng, ne bubóng bu/na omu, ké nǎ, Osówo mú Sána ne mú Ézerel mu o-bâ.

⁹ Wo a/chi omu o-na chwóó, ne a/nap esí eyên nyí baryî ba/mû baa/man.

¹⁰ Banet eyên ba/chi byise ebe ányi ké nyǐ. Ké kanong eyên, wo a/kye banet-kyikpu ńkyí mbe ba-ryuu ng.

¹¹ Óburúkpâbí o/kye busa, ne banyinyi chwóó ba/kúng bǎmpém ámbe ba/fu,

¹² batu ne bannwa byití ebe ba-kú ba-chêe ng. Banyinyi ḿbé ké byise mbe ba-kyii ng ńkyí ba/koo ké byití.

¹³ Ba/kám byěm ḿbyí ba/mee wǎ ámalê, ḿbyí ba/cít kámbyí ne syílyíba, ḿbyí abyibabang ebe nyi a-san n ne gûl mú onong onong. Ebóng kyi/chi ne ben kyicê-banet ba-waa ké nkám-ebû ké dyicí-byití.

¹⁴ Osówo mú o/rêe o-shwôm o/chi abíp a-róng ké nkéré o/chi batu ba-firi byiryibyiryi ké kaku ńké Zámon.

¹⁵ Baryên ḿbé kaku ńké Báshan baa*nwa eri*. Nké ka/jê ne ecím-eku.

¹⁶ Ebóng ńkyí wo a/bwom ké biǐtí-ecím-eku ámbyi a-tún kaku ńké Osówo ne ecábé, ńké nyǐ o/cá o/fu, nyǐ o-kyú u. Óburúkpâbí o/chi o-kyú ányi ne banyá.

¹⁷ Óburúkpâbí [o-fím m ké Sána] o-bâ ké kyikit-ociring emen ne égot-bamútu emen ḿbé bubyî-orá budatut, ḿbé baryên baryên.

¹⁸ Nyǐ mu o-yú u o-jâ kyíbóng kyíbóng, o-yip ng bujê-banet-mgbokobá o-dim m ne mbé. Nyǐ mu o-koo ng eyáré nyí bambíri bunwa ne nyǐ mbe ba-kyâ ǎ. Osówo Óburúkpâbí o/chi o-kyú ányi.

¹⁹ Kye n̂g Óburúkpâbí mú mu o-tû ng busông eten ké dyicí ké dyicí akpee. Nyǐ nké mu Osówo mú mu o-nyii ng bě.

²⁰ Osówo mú eten mu Osówo mú mu o-nyii ng banet. Nyǐ mu Osówo Óburúkpâbí eten mú mu o-fîm m bě ké bukyû.

²¹ Ké ntûntû, Osówo o/chi o-sé banet-bushwôn emen ashí, ne nyí banet ḿbé mbe ba-câ kashú ne byibî-akwóp ebe.

²² Óburúkpâbí oo/raa o/fu, me n/chi n-da-kúng banet-bushwôn enen ké Báshan m-bâ běn ne mbé. Me n/chi n-fîm kámbé ké biǐríbíríbí-byikit-baya ḿbé baryên m-bwa ne mbé esim,

²³ eringe nyí ben ba/chi ba-cen ba-shwôm ké baróng ebe, ne eringe bubyî enen budarû baróng ámbe eringe nyí mbu bu-ryuu ng.

²⁴ Ô Osówo mú mu Otu ejí, banet kángkáng baa/ri otáng-byití eyên mú a/kpógê, mú mu o-nung ng o-câ ké kyikit eyên ńkyí ociring.

²⁵ Bankwân ane mbe ké kashú, bankim ane mbe ké esim, ne bwǎn-banyinyi mbe ké otyém ba-só ng byícícágé.

²⁶ Kye n̂g Osówo akpee ké ncibi mú banet emen. Kángkáng banet ḿbé kyikû-Jekôp, kye n̂g Óburúkpâbí akpee.

²⁷ Oshê-Běnjámin mú o/sîi o-shwôm mu o-bâ kashú, ne batu-ashí ḿbé Júda ne banet ebe ba-nye, ne batu-ashí ḿbé Zébélon ne Nafatályi ba-nye kámbé ké kyikû.

²⁸ Ô Osówo, tông busa eyên. Busa ḿbú aa/yip

²⁹ ké kiǐtí-kyise-kyifen eyên echi ké Jerúsélem, a-chi byěm ké dyishí eten, ké kyikit ńkyí batu mbe ba-bâ ǒ ne eyáré. [

³⁰ Raa ne Éjip nyí nyi wǎ enyam-dyikán, nyí nyi ké asín-byichí nyí bukô-kace. Raa ne eshê nyí ee*nyît ǒ wo* nyí nyi wǎ dyibóng-bampong ḿbé mbe ne bwǎn ebe tete mbé kángkáng ba-tíngê kyísí ba-yárê ǒ akpuga ebe. Chi banet ámbe ḿbé byití byidanyîn kámbé enwa ba-firi byiryibyiryi.] [

³¹ Banet-kyitwóm] ba/chi ba-fím Éjip ba-bâ. Banet ḿbé Sudân ba/chi ba-bêem abwô kyíbóng ba-fé nshwam ba-kye Osówo.

³² Kángkáng batu ḿbé ejíí, kwán n̂ ekwan ba-kye Osówo. Kwán n̂ ekwan-akpee ba-kye Óburúkpâbí,

³³ ba-kye ǎ nyǐ mú mu o-yú u ké bubóng, bubóng ḿbú bu/fím ne karé. Fwôo n̂g atông ba-jwo ǎ ké mu o-nyán n ne kyirime ńkyí kyiryên kyiryên.

³⁴ Sét n̂g kyi-kim ne busa ḿbú Osówo mú butu emen mbu ké Ézerel, busa emen mbu kyíbóng.

³⁵ Bushî ḿbú Osówo odachi ké nkéré o-kú o-byí i ké kyikit-ociring emen boo*nwa eri*. Osówo mú Ézerel mu o-kyâ banet emen bushwane ne busa. Kye n̂g Osówo akpee.