SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 66 - Bokyi Bible

Okwan-Akpee ne Asǎma ekó

¹ Kángkáng banet bakye Osówo akpee ne ejá kyíbóng kyíbóng ne bunyîn-dyityém.

² Kwán n̂ ekwan-akpee nyí dyizîn emen. Kye n̂g ǎ kiǐtí-akpee.

³ Sét n̂g Osówo ba/fu, byěm eyên ḿbyí amu a-chi i mbyi biǐtí kanong kanong. Busa eyên ḿbú mbu bu-chi i banet-bushwôn eyên ba-tíngê kyísí ké bushî, ké bushú eyên, bu/rêe bu-shwôm.

⁴ Nang yeě ké ejíí mu o-fâ ǒ. Mbe ba-kwán n ekwan-akpee ba-kyâ ǒ. Mbe ba-kwán n akpee ba-kyâ dyizîn eyên.

⁵ Bâ n̂g ba-ba-ri ńkyí Osówo oo/chi, ba-ri biǐtí-byěm ḿbyí o/chi ké burwám-banet.

⁶ Nyǐ o/yángê baya ḿbé baryên ba-firi esí nyí yéyé. Banchí eten ḿbé kpákpá ba/nyáng baya ámbe ké byiká. Ányi nké banet eten ba/jêe ké bubwô ńkyí nyǐ o/chi.

⁷ Nyǐ mu Otu mú ne banyá ké busa emen, ne mu o-tún n eshê nyí ké ejíí achi. Banet ba*dachi ba-bírî bunwa ne nyǐ*.

⁸ Eshê kángkáng ekye Osówo eten akpee. Kyi/bát bajwo akpee enen nyí bamu ba-kyâ.

⁹ Nyǐ oo/tî bě okpó, ne o*da bě emîng byi-róng*.

¹⁰ Osówo, wo aa/tî bě ké nkan. Wo aa/kan bě wǎ eringe nyí okwâ odachi syílyíba o-firi kpárám.

¹¹ Wo aa/mîng bě byi-róng ké kaǎtám, ne a/tû bě atû ké dyishí nyí nyi a-ró ng.

¹² Wo a/mîng banet-bushwôn eten ba-cím bě byiká ké byiko. Be byi/shwôm ké kafâ-okwâ ne ké kiǐsúsú-baya. Nké kántîk, aa/bê ne be ké kyikit ńkyí chwǒm kii*ta bě*.

¹³ Me n/chi m-bâ ké kyise eyên ne eyáré nyí badashí. Me n/chi n-yárê ǒ ńkyí n/ryí ǒ ocím.

¹⁴ Me n/chi n-kye ǒ ńkyí n/fu, n-kyâ ǒ ké nkéré m/mû ké afaníkong.

¹⁵ Me n/chi n-kye etyítǎm ba-shí ké kyikit ńkyí bada ǒ echi kyifen. Me n/chi n-kúng batyép-bampong ne etúbû n-chi kyifen n-kye ǒ, ne arúkwâ a/chi a-yú a-jâ kyíbóng.

¹⁶ Kángkáng banet ḿbé mbe ba-shî ng Osówo, bâ n̂g ba-ba-jwo, ne me n/chi n-sét běn ńkyí nyǐ oo/chi o-kye mě.

¹⁷ Me n/tii n-kó ǎ n/fu, ochwáp mě. Me n/kye ǎ akpee ké ekwan.

¹⁸ Â [byibî byi/mû mě ké dyityém,] Óburúkpâbí o/mû oo*ba/chi o-fwôo atông o-jwo mě*.

¹⁹ Nké ké ntûntû, Osówo oo/jwo mě. Oo/fwôo atông ké nshwam ejí.

²⁰ Me mu n-kyâ Osówo akpee, ké nǎ, nyǐ o*da/né nshwam ejí* o-mîng mě nang kyijé emen ńkyí kii*man* etông*.