SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 65 - Bokyi Bible

Akpee ne Asǎma ekó

¹ Ô Osówo, nkyi kanong ńkyí be byida ǒ ekye akpee ké Záyon, byi-tî ocím eten mú byi/ryí ǒ,

² ké nǎ, wo amu a-jwo ng banshwam eten. Kángkáng banet ba/chi ba-bâ ba-kâm ǒ

³ ké dyishí-byibî ebe. Byibî eten mbyi byi-kpógê ng [bě.] Nké wo amu a-pwoo ng bě kámbyí.

⁴ Bunyîn-dyityém mbu ne banet ḿbé wo a/cá a-bâ ne mbé a/fu, bakûkyú ké kyise eyên. Be byi/chi byi-zût ké byěm ḿbyí byinong ḿbyí mbyi ké kyise eyên ńkyí nkyi kiǐtí-kyise-kyifen eyên echi.

⁵ Wo amu a-faa ng bě ké ochi mú amu a-chi i bě byi-kpógê e, ne wo amu a-chi i biǐtí-byěm eringe nyí ada bě enyii. Kángkáng banet ké ejíí nang ké esim-baya nyí áku mbe ba-fâ dyityém ké wo.

⁶ Ké busa ḿbú eyên nké wo aa/bi eku cip a-tông kiǐtí-busa eyên.

⁷ Wo amu a-chi i kyirime-baya ne bunâng emen byi-chee beem. Wo amu a-chi i banet ḿbé mbe ba-nyámê e ne barî ba-chee beem.

⁸ Ejíí emúmú e/firi ké bushî ké biǐtí-byěm ḿbyí wo aa/chi. Ejá nyí bunyîn-dyityém nyi e-fím m ké ejíí emúmú ké byěm eyên ḿbyí amu a-chi i.

⁹ Be byimu byi-ri ng eringe nyí amu a-tún n esí ké omu mú wo amu a-twóm m. Wo amu a-chi i kányí e-kûnwa byiryíng. Wo amu a-chi i omu o-sú u ké buce. Wo amu a-kyâ esí byíkwôn. Něen nké amu a-chi i kányí.

¹⁰ Wo amu a-chi i omu o-na ké byifát, a-chi omu o-sú ké mbyí. Wo amu a-chi i kyibû kyi-jwâa esí, a-chi esu-byichí e-kán.

¹¹ Kanong eyên nke ka-chi i byiryíng byi-jê ḿbyí badafuu. Nang nyá nké wo a/ce, a-ri ng byiryíng chwóó.

¹² Baryî-ebû baa/sú ne ebû. Bunyîn-dyityém boo/sú ké eku.

¹³ Aro aa/sú ne ebû. Byifát bii/sú ne byiryíng. Kángkáng byěm mbyi byi-kwán n ne ejá kyíbóng kyíbóng ké bunyîn-dyityém.