SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 63 - Bokyi Bible

Osówo eryuu

¹ Ô Osówo, wo nké amu Osówo ejí. Me mu n-ryuu ng ǒ. Kyirim-enyam-byiko ejí kángkáng nkyi kyi-ryuu ng ǒ. Busun ejí mbu bu-ryuu ng ǒ éné wǎ kiǐyéyé-esí nyí baryî ne omu byi*fí to*.

² Ké bubwô ámbu, me nn/kyé ǒ ké kyise eyên n/fu, n-ri ng busa eyên ne busan eyên ḿbú ragerage.

³ Kyijé eyên ńkyí kii*man* nkyi kanong kyi-shwôm dyikpen dyiyén, ne ké bubwô ámbu, me n-kyâ ǒ akpee.

⁴ Me n-kó ng ǒ asǎma tete m-kpú. Me n-yip ng abwô ejí kyíbóng ké nshwam n-kye ǒ.

⁵ Busun ejí bu/chi bu-ryí bu-zût, ne me n/chi n-kwán ekwan-akpee ké bunyîn-dyityém n-kye ǒ.

⁶ Me mu n-zîim m ǒ ké nkéré nn/rí sáre. Me mu n-kabe ng kyi-kim ne wo buchú bumúmú,

⁷ ké nǎ, wo kángkáng nkéré amu Onet-Ochwâp ejí. Me mu ké ókpâ eyên, n-kwán n ekwan ké bunyîn-dyityém.

⁸ Me mu n-king ng m-bât ng ǒ ké byiko, ne abwô eyên aa*bángê chwǒm kyi-ta mě*.

⁹ Nké banet ḿbé mbe ba-kan n ba/fu, mbé ba-ju ng mě, ba/chi ba-jâ ké oshê-bakúsí.

¹⁰ Ba/chi ba-ju kámbé ké byití, ne enyam e/chi e-ryí byikwóm ebe.

¹¹ Otu-oshê o/chi o-jêe, ké nǎ, Osówo oo/chi ǎ o-kpógê banet-bushwôn emen. Banet ḿbé ba/ryí ocím ké bushú-Osówo ba/chi ba-kye ǎ akpee. Nké Osówo o/chi o-cít bansêt byisédéng ocím.