SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 61 - Bokyi Bible

Nshwam-Oku

¹ Ô Osówo, jwo bukyû ejí ḿbú mu n-tii ng. Fwôo atông a-jwo nshwam ejí.

² Ké nkéré n/zú dyityém, me n/kyú tíbítíbí ne byise n-kó ǒ. Kúng mě a-dim ne me ké kyikit-dyirem ńkyí chwǒm kii*ta mě*.

³ Ké nǎ, wo nké amu a-ku ng mě, ne amu a-nyii ng mě shwanshwan ké abwô nyí banet-bushwôn ejí.

⁴ Mîng mě n-kyú ké kyikit-ociring eyên ké dyikpen ejí kángkáng. Mîng mě n-ri kyikit ńkyí chwǒm kii*ta mě* ké dyifít-abyibabang eyên.

⁵ Ô Osówo, wo aa/jwo ocím ejí mú n/ryí, ne wo aa/kye mě ńkyí kyi/já banet ḿbé mbe ba-shî ng dyizîn eyên.

⁶ Sû aje nyí otu odachîkpen. Mîng ǎ o-kpen o-ca kashú káshu.

⁷ Ô Osówo, kyi/bát nyǐ okyú otu ne banyá ké bushú eyên. Ku ǎ ne kyijé eyên ńkyí kii*man* ne ocím eyên mú amu a-tî ng.

⁸ Ké bubwô ámbu, me n/chi n-kwán ekwan-akpee kángkáng nkéré n-kye ǒ ké nkéré mú mu n-yárê ng ǒ kángkáng ací ké ńkyí n/ryí ocím.