SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 60 - Bokyi Bible

Nshwam-Onyii

¹ Ô Osówo, wo aa/né bě, ne aa/kpógê bě. [Wo kaa/sa ǒ ne be. Nké kántîk, bírî a-kâm bě.]

² Wo aa/chi oshê o-náng, ne aa/ját kámú a-tî fúú. Kántîk, chi byinêm emen byi-man, ké nǎ, mǔ o/firi byicê byicê.

³ Wo aa/chi banet eyên ba-ri afaníkong kanong kanong. Be byimu byi-cíng ng éné wǎ byimu byi-bwóm m bato.

⁴ Wo aa/kuri banet ḿbé mbe ba-shî ng ǒ ekó eringe mbé badafem.

⁵ Nyii bě ké busa eyên. Faa ojá ké nshwam eten eringe nyí banet ḿbé mbe ba-jê ng ǒ badafem.

⁶ Osówo [o/bwom ké kyikit-ociring emen] o-raa o/fu, me n/chi m-kpógê n-kyii Shékem byicê byicê n-kyii owo mú Súkot n-kye banet ejí.

⁷ Gyílet o/já mě, Manáse o/já mě to. Éferem mu mě otam-byití ejí, ne Júda mu mě ochí-butu ejí. Nké n/chi n-kúng Mówep wǎ dyicáng-abwô esoo ejí.

⁸ Ne n/chi n-twóp abe ejí ké Édom, kyi-bwom wǎ ekap nyí edatông e/fu, e/já mě. Banet-Fyilíta ba/mû ba/kabe ba/fu, mbé ba-man n ewonge ba/fu, mbé baa/kpógê mě dí.

⁹ Ô Osówo, yeě o/chi o-kúng mě o-da-fé ké oshê mú mu shwaneshwane. Yeě o/chi o-sí mě n-ca Édom.

¹⁰ Wo aa/né bě ké ntûntû? Wo aa*ba/chi a-dim ne bannwa byití eten ké kyikû*?

¹¹ Chwáp bě byi-nwa ne banet-bushwôn eten. Ochwâp mú banet o*da/byí chwǒm*.

¹² Be byi/chi byi-kpógê â Osówo mu kyicê ńkyí eten. Nyǐ o/chi o-kpógê banet-bushwôn eten.