SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 6 - Bokyi Bible

Nshwam-Ochwâp ké Nkéré-Afaníkong

¹ Óburúkpâbí, *daraa ne me ké kafâ esa*. *Da mě ekye busông ké kafâ esa*.

² Ô Óburúkpâbí, ri mě bafip, ké nǎ, me n/firi kyeekyee. [Kye mě busa,] ké nǎ, me asa aa/man mě kángkáng.

³ Ne kyirim-enyam-byiko ejí kángkáng kyi/firi ké kiǐtí-afaníkong. Ô Óburúkpâbí, wo a-bám m ka-bwon nǎ ne a-chwáp mě.

⁴ Óburúkpâbí, bâ a-ba-nyii mě. Nyii mě ké bukyû ké bubwô-bafip eyên ḿbé amu a-ri ng banet.

⁵ Wo baa*zîim ǒ ké oshê-bakúsí*. Onet o*fí nang obónge mú oda ǒ ekye akpee áku*.

⁶ Me nn/kyee ké bafip ejí. Kángkáng buchú, karíng ejí nke ka-firi ng gbodok ké bukyû ḿbú mu n-tii ng. Batíí mbe ba-cok ng kyichí-dyishí ejí.

⁷ Me n*fí to n-rángê e kanong* ké nǎ, achi ejí aa/mut ké bukyû ḿbú banet-bushwôn ejí mbe ba-chi i mě n-tii ng.

⁸ Byibî-banet, bwom m̂ mě cát. Óburúkpâbí mu o-jwo ng bukyû ejí ḿbú mu n-tii ng.

⁹ Nyǐ mu o-fwôo ng atông o-jwo ng bukyû ejí ḿbú mu n-tii ng n/fu, ochwáp mě. Ne nyǐ o/chi o-faa ojá ké nshwam ejí.

¹⁰ Banet-bushwôn ejí ba/chi ba-ri eringe dyikpóge ndyi dyi-kyâ kiǐtí-éshwân. Ba/chi ba-byí kámbé kiǐmút ba-chi kámbé ba-firi byiryibyiryi, ba-ró kámbé.