SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 57 - Bokyi Bible

Nshwam-Ochwâp

¹ Ô Osówo, ri mě bafip. Ri mě bafip, ké nǎ, me mu m-bâ n-kâm ǒ n/fu, ku mě. Me mu n-rem m ké kiǐríribí-abyibabang eyên tete byibî-afú nyí aryên a-mîng etugi.

² Me mu n-kó ng Osówo mú mu kyíbóng kyíbóng, Osówo mú mu o-kyâ nang ebóng ńkyí mu n-ryuu ng.

³ Nyǐ o/chi o-faa áku kyíbóng o-nyii mě. Nyǐ o/chi o-kpógê banet ḿbé mbe ba-cít ng mě. Osówo o/chi o-tông mě kyijé emen ńkyí kii*man* ne o-chi ńkyí o/ryí ocím.

⁴ Banet-bushwôn ejí ḿbé mbe wǎ ekpang nyí nyi e-ryí i banet baa/wâng mě. Asháng ebe nyi wǎ byíbye ne abán. Bubyíbabang ebe mbu wǎ biininen-bushwám.

⁵ Ô Osówo, tông baryên eyên ké bubóng ne busa eyên ké ejíí emúmú.

⁶ Banet-bushwôn ejí baa/nabe kaǎsém ńké bada mě ekám. Bafip baa/man mě busa. Mbé ba/sím dyibíng ké kiǐfáng ejí, nké mbé ba/róng ké ndyí mbé bayén.

⁷ Ô Osówo, dyityém ejí ndyi shwaneshwane. Me n/chi n-kwán n-kye ǒ akpee.

⁸ Busun ejí, jwóbê. Dyícîng ejí ne égûm ejí, jwóbê n̂g. Me n/chi n-chi óbyísû o-jwóbê.

⁹ Ô Óburúkpâbí, me n/chi n-kó ǒ asǎma n-kye ǒ akpee ké burwám-eshê nyí ee*nyît ǒ*.

¹⁰ Kyijé eyên ńkyí kii*man* nkyi kyi-ribi ng bubóng. Ochi eyên mú amu a-chi i ńkyí wo a/ryí ocím, mu o-ta ng ófíbí.

¹¹ Ô Osówo, tông baryên eyên ké bubóng ne busa eyên ké ejíí emúmú.