SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 54 - Bokyi Bible

Nshwam-Onyii ké Abwô nyí Banet-Bushwôn

¹ Ô Osówo, nyii mě ké busa eyên. Ké busa eyên, chi mě n-fem.

² Ô Osówo, jwo nshwam ejí. Fwôo atông ké byiraa ejí. [

³ Bantông byiko] mbe ba-bâ bunwa ne me. Bambên atyém ḿbé mbe banet ḿbé ba*fí ba-kérê ng kyi-kim ne wo* mbe ba-kan n ba/fu, mbé ba-ju ng mě.

⁴ Nké Osówo nké mu Onet-Ochwâp ejí. Óburúkpâbí nké mu mě ké esim.

⁵ Kyi/bát Osówo okúng byibî ebe mbé bayén o-kye banet-bushwôn ejí busông. Nyǐ o/chi o-ju kámbé, ké nǎ, nyǐ o-chi i ńkyí o/ryí ocím.

⁶ Ô Óburúkpâbí, [me n/chi n-chi kyifen n-kye ǒ ké bunyîn-dyityém.] Me n/chi n-kó ǒ asǎma, ké nǎ, wo a/nwa dyityém.

⁷ Wo aa/chi mě n-fem ké afaníkong ejí kángkáng, ne nn/ri ké baa/kpógê banet-bushwôn ejí.