SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 53 - Bokyi Bible

Byibî ḿbyí Banet

¹ Enyam-banet e-sét ng byiko ebe e/fu, Osówo o*fí*. Mbé kángkáng baa/bên byiko ebe, ne baa/chi byibî-byěm. Onet o*fí mú mu o-chi i ńkyí nkyi kanong*.

² Osówo mu kyíbóng o-tún n banet achi o-ri â banet mbe kô ḿbé mbe ne bubong, ne â banet mbe kô to ḿbé mbe ba-kyâ ǎ ofê.

³ Nké mbé kángkáng baa/bírî ǎ esim. Onet o*fí nang obónge ké burwám ebe mú mu o-chi i ńkyí nkyi kanong*. Nang obónge o*fí*.

⁴ Osówo mu o-bí ng o/fu, mbé ba*fí ba-nyît ng dí*. Banchi byibî ḿbén ba*fí ne bubong*? Mbé mbe ba-kpen n ké banet ejí byěm ejii, ne mbé ba*fí ba-fâ nshwam ba-kyâ mě*.

⁵ Nké bushî bu/chi bu-róng kámbé bu-shwôm ḿbú mbé ba/mû baa/ri, ké nǎ, Osówo o/chi o-pwó byikúú ḿbyí banet-bushwôn-banet emen byiryibyiryi. Osówo oo/né kámbé. Ké bubwô ámbu, banet-Ézerel ba/chi ba-kpógê kámbé kángkáng.

⁶ Ô, me mu n-fâ nshwam n/fu, kyi/bát onyii ofím ké Záyon o-bâ o-kâm Ézerel. Banet-Ézerel ba/chi ba-kyú ké bunyîn-dyityém ké nkéré Osówo [oo/chi kámbé ba-chîjá byěm.]