SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 52 - Bokyi Bible

Osówo o/pan Kyibî-Onet Mpan

¹ Kiǐtí-onet, ebóng ńkyí amu a-tông ng byiko ké byibî eyên. Kyijé ńkyí Osówo nkyi ne banyá.

² Wo amu a-tî ng okabe mú barî-banet ebên. Kabyíbabang eyên nke wǎ kyikwâm ńkyí kyidanen. Wo amu a-rim m ne byisédéng kángkáng nkéré.

³ Kyibî kyi-jê ng ǒ kyi-shwôm kyinong. Kyisédéng kyi-jê ng ǒ kyi-shwôm ntûntû.

⁴ Kyi-jê ng ǒ, ǎ nsêt byisédéng, ńkyí adachi kyi-sa banet ké byiraa eyên eraa.

⁵ Ké bubwô ámbu, Osówo o/chi o-bên ǒ ne banyá. Nyǐ o/chi o-tím ǒ byizim, o-fîm ǒ ké kyise eyên. Nyǐ o/chi o-fîm ǒ ké ejíí nyí banet bakpó.

⁶ Banet ḿbé mbe ba-chi i kanong ba/chi ba-ri ńkyín, ba-kpet eshî, ne mbé kâng ba/chi ba-jwó ǒ ba-raa ba/fu,

⁷ kûri, nyín onet mú o*da/jêem esim ne Osówo o/fu, okyú kyikit-dyirem emen*. Nké nyǐ o/bwa o-fé dyityém ké biǐtí-efang emen, ne nyǐ o/kúng dyityém ebên wǎ kyikit-dyirem emen.

⁸ Nké me mu wǎ dyisín-kyichí ńkyí nkyi kyi-kán n ké kyise ńkyí Osówo. Me mu n-fâ dyityém ejí ké kyijé emen ńkyí kii*man ne banyá ne banyá*.

⁹ Osówo, me n/chi n-kó ǒ asǎma kángkáng nkéré ké ńkyí aa/chi. Me n/chi n-sét ké bushú-banet eyên n/fu, wo amu kanong.