SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 49 - Bokyi Bible

Enyam eróng nyí Dyityém efé ké Efang

¹ Nang yeě ojwo ńkyín. Kángkáng banet ké ejíí,

² nang ḿbé mbe biǐtí nang ḿbé ba*fí biǐtí* cibicibi ne ḿbé mbe ne esang ne ḿbé kyikpu, fwôo n̂g atông.

³ Okabe ejí o/chi o-kyú kiǐtí. Me n/chi n-raa byiraa ḿbyí bubong.

⁴ Me n/chi m-bírî dyityém ejí n-tî ké atím-ekan, ne me n/chi n-sét eringe atím-ekan ányi a/byí ké nkéré n-kú n-kim m dyícîng.

⁵ Me nn*shî ké nkéré mú afaníkong* nang ké nkéré mú banet-bushwôn ejí

⁶ ne byibî-banet ḿbé ba/fé atyém ké efang ebe ne byiko etông ké efang ányi baa/wâng mě*.

⁷ Onet oo*man eré dyifwá ńdyí [dyikpen emen*] o-kye nang Osówo akpuga ké dyishí-dyikpen emen*

⁸ ké nǎ, onet oo*man eré kándyí*. Ńkyí onet odakye ké dyikpen-onet kii*tigi kyi-kwárê*

⁹ ńkyí onet ámu oo*kpú to ne banyá* oo*ri dyikun*.

¹⁰ Nang yeě mu o-nyît ng o/fu, nang banet-bubong mbe ba-kpú u. Eringe ebónge to ne enyam-banet ne ḿbé bubong bu*fí*. Mbé kángkáng mbe ba-kpú u ba-mîng efang ebe ne banryî bukyû. [

¹¹ Akun] ebe nké nyi kámbé byise ebe. Mbé ba-waa ng ányi kángkáng nkéré, nang ké mbé ba/mû ne esí nkéré obónge.

¹² Efang ee*man enyii nfang-onet ké bukyû*. Nyǐ o-kpú u to wǎ enyam.

¹³ Ri n̂g ńkyí nkyi kyi-chi i banet ḿbé ba/fé dyityém ne byiko ebe. Ba-ri [ńkyí nkyi kyi-chi i] banet ḿbé ba/fu, efang nké eda mě ekwárê.

¹⁴ Osówo oo/tî kámbé bukyû ekpú wǎ ebû. Ne bukyû nké bu/chi bu-kyú kámbé wǎ mbâm ebû. Banet ḿbé mbe ba-chi i kanong ba/chi ba-kpógê kámbé ké nkéré mú byikúú ebe byi-kú byi-fwôo ng ochéé óchee ké oshê-bakúsí mú [o*fí fáráng ne oshê ebe*.]

¹⁵ Nké Osówo o/chi o-nyii mě me. Nyǐ o/chi o-nyii mě ké abwô nyí bukyû.

¹⁶ *Dachi a-kérê ké nkéré onet oo/já esang* ké nkéré esang emen e/jê ojéng e-shwôm*.

¹⁷ Nyǐ oo*ba/chi o-yip kányí ké nkéré oo/kpú*. Esang emen ee*dim ne nyǐ ké kyikû ké nkéré baa/ryii ǎ*.

¹⁸ Nang dyikpen ńdyín dyi-bwa dyi-kwárê onet, ne banet mbe ba-kpee ng onet ámu, ké nǎ, nyǐ ka/nwa ǎ,

¹⁹ nyǐ o/chi o-kâm banchí emen ké oshê-bakúsí, kyikit ńkyí kyifip nkyi kyi-waa ng ne banyá.

²⁰ Efang [ee*man enyii nfang-onet ké bukyû*.] Nyǐ o-kpú u to wǎ enyam.