SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 48 - Bokyi Bible

Záyon, Oshê mú Osówo

¹ Óburúkpâbí o/rêe, ne ba-man ba-kye ǎ akpee kanong kanong ké oshê mú Osówo eten, ké kaku emen ńké ociring.

² Záyon mú mu kaku ńké Osówo o/nyâam, ne mu o-nwa ng bunong. Oshê mú Otu mú o/rêe o-shwôm mu o-kyâ ejíí emúmú bunyîn-dyityém.

³ Osówo oo/tông o/fu, chwǒm kii*ta onet mú mu ne nyǐ ké kafâ-byise ḿbyí badabwom ba-nwa byití*.

⁴ Batu ba/kpaa barî kyikit kyibónge ba-bâ bunwa ne kaku-Záyon.

⁵ Nké ké nkéré ba/ri kánké, mbé ba/waa ocím ké dyishí fúú, ba-shî ba-chêe.

⁶ Bushî ne kyibî-busông byi/róng kámbé wǎ onyinyi mú bufwon mbu bu-nwa ng ǎ,

⁷ wǎ bǎnsukyíkang ḿbé kyibî-afú nyi a-náng ng kámbé.

⁸ Be bii/jwo ńkyí Osówo o/chi, ne bii/ri kánkyí kántîk ké oshê mú Osówo Óburúkpâbí eten mú o/rêe o-shwôm. Nyǐ oo*ba/chi o-bángê chwǒm kyi-ta oshê ámu ne banyá*.

⁹ Ô Osówo, be byimu byi-kabe ng kyi-kim ne kyijé eyên ńkyí kii*man* â byi/nung ké kiǐtí-kyise-kyifen eyên echi.

¹⁰ Banet mbe ba-kyâ ǒ akpee kángkáng byikit, ne dyizîn eyên ndyi dyi-káng ng ké ejíí emúmú. Wo amu Otu mú oo*ryí acît*.

¹¹ Kyi/bát banet ḿbé Záyon bakyú ne bunyîn-dyityém. Kyi/bát eshê nyí Júda ekyú ké bunyîn-dyityém, ké nǎ, bampan eyên mbe ntûntû.

¹² Banet-Osówo, cen n̂ ba-wáp Záyon ba-pan biǐnyáám-byikit-mbâm.

¹³ Tún n̂ ekpe ba-ri, ba-kpúrî byise ḿbyí badabwom ba-nwa byití, eringe nyí ben badaman esét bwǎn ḿbé mbe ba-bâ ba/fu,

¹⁴ Osówo mún o-chi i Osówo mú eten ne banyá ne banyá. Nyǐ o/chi o-tông bě kiǐfáng ké nkéré mú mu o-bâ.