SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 47 - Bokyi Bible

Óburúkpâbí mú mu Otu mú Ejíí

¹ Kángkáng banet, shwóm m̂ akwâ ké bunyîn-dyityém. Kwán n̂ ekwan-akpee ne ejá kyíbóng kyíbóng ba-kye Osówo.

² Ké nǎ, Óburúkpâbí mú mu kyíbóng kyíbóng mu Osówo mú bada ǎ eshî. Nyǐ mu Otu mú o/rêe o-shwôm, mú mu o-tún n ejíí kángkáng.

³ Nyǐ oo/chi banet ba-firi ké bubwô eten. Nyǐ oo/chi eshê e-firi ké bubwô eten.

⁴ Nyǐ o/cá esí ńnyín nyí byimu byi-tông ng byiko ké nyǐ. Esí nyí o/kye Jekôp mú oda ǎ ejê.

⁵ Osówo oo/yú kyíbóng ké kakyúng-butu emen. Banet mbe ba-jêe ng ne ejá kyíbóng kyíbóng, ne mbe ba-jwá ng bantán ké nkéré Óburúkpâbí mu o-yú u o-câ kyíbóng.

⁶ Kwán n̂ ekwan-akpee ba-kye Osówo. Kwán n̂ ekwan-akpee ba-kye Otu eten.

⁷ Osówo nké mu Otu mú ejíí kángkáng. Kwán n̂ ekwan ba-kpee ǎ.

⁸ Osówo mu o-kyú u ké kakyúng-butu-ociring ńké emen. Nyǐ nké mu o-tún n eshê kángkáng wǎ Otu.

⁹ Batu ḿbé eshê ba/cibi kyikit kyibónge [ne banet] ḿbé Osówo mú Ébarahâm, ké nǎ, Osówo mu ne busa o-shwôm kángkáng bannwa byití. Nyǐ mu Otu mú o/rêe.