SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 45 - Bokyi Bible

Okwan-Dyibé ńdyí Otu

¹ Bunyîn-ejá bu/sú mě ké dyityém ejí eringe nyí mu n-kwán n okwan mún n-kye otu. Kabyíbabang ejí kaa/kpá byiko ḿbyí okwan wǎ kachí-nwet ńké mman esáng nwet.

² Wo amu a-nwa ng bunong a-shwôm kángkáng banyinchéng. Wo amu a-nyîn n ejá. Osówo oo/jware ǒ kángkáng nkéré.

³ Otu mú o/rêe o-shwôm, bwá kashwám eyên ké osín. Wo amu kiǐtí ne busa.

⁴ Yú ké busa a-da-kpógê eringe nyí adanyii ńkyí nkyi ntûntû ne [ńkyí acît a*fí*.] Busa eyên bu/chi bu-chi ǒ a-kpógê byití ḿbyí byiryên.

⁵ Abán eyên nyi a-nen n. Nyi a-tím m atyém nyí banet-bushwôn eyên. Eshê e-myii ng ǒ ké byiká. [

⁶ Kyibám-butu ńkyí Osówo oo/kye ǒ] kyi/chi kyi-waa ne banyá ne banyá. Wo amu banet eyên otu mú oo*ryí acît*.

⁷ Chwǒm ńkyí nkyi kyinong nké kyida ǒ ejê, ńkyí nkyi kyibî kyi-sa ng ǒ dyityém. Ké bubwô ámbu nké Osówo mú mu Osówo eyên oo/cá ǒ, ne oo/fé ǒ bunyîn-dyityém ké byiko bu-jê bu-shwôm ḿbú otu nang orá.

⁸ Kyinung-burwan ḿbú badakó mîi ne ḿbú badakó álos nkyi ǒ ké byídí. Bankim ane mbe ba-tî ng ǒ ké bunyîn-dyityém ké kyibám eyên ńkyí ba/nap ne asháng-eshwa.

⁹ Bwǎn-batu ḿbé banyinyi mbe ké burwám-ásé nyí nyi a-kyâ ǒ ofê. Onyi eyên mu ǒ cip ké kyicê-bubwô-etyebéng eyên ne byibwáng-gûl mú o/nwa o-shwôm ké byiko.

¹⁰ Onyi-ofyîfî mú otu, fwôo atông a-jwo ńkyí mu n-sét ng. Ráp banet eyên ne bwǎn-bané eyên.

¹¹ Bunong eyên bu/chi bu-chi otu o-kû ǒ eryuu. Nyǐ nké mu bonchí eyên, ké bubwô ámbu, a-man a-chi ńkyí nyǐ o/sét ǒ.

¹² Banet ḿbé Táya ba/chi ba-bâ ǒ ne eyáré. Banfang-banet ba/chi ba-kan eringe mbé bada ǒ echi kyi-kû ǒ enyîn ne mbé.

¹³ Wǎn-otu mú onyinyi mu ké kyibám-otu. Nyǐ mu o-nwa ng bunong kanong kanong. Ba/chi ewuryi emen ké bacat-gûl.

¹⁴ Nyǐ o/fé ewuryi nyí enong enong, ba-sí ǎ ne bacín emen ké kyikû o-kâm otu. Ba/yip to bacín emen ba-kâm otu.

¹⁵ Mbé ba/banung ké ócâm-otu ne bunyîn-dyityém ne ojêe.

¹⁶ Wo, otu ejí, a/chi a-já bwǎn-banyinchéng chwóó ḿbé ba/chi ba-kúng kyikit ńkyí banchí eyên ḿbé kpákpá wǎ batu, ne wo a/chi a-chi kámbé batu ḿbé [ejíí emúmú.]

¹⁷ Okwan ejí o/chi o-chi dyizîn eyên dyi-waa ne banyá, ne kángkáng banet ba/chi ba-kye ǒ akpee ké kángkáng nkéré mú mu o-bâ.