SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 44 - Bokyi Bible

Nshwam-Oku ké Afaníkong

¹ Ô Osówo, be bii/jwo kánkyí ne atông eten. Banchí eten ḿbé kpákpá baa/sét bě kyi-kim ne nkyí, kyi-kim ne biǐtí-byěm ḿbyí wo a/chi ké nkéré mú ebe, ké ací nyí a/shwôm ké esim,

² eringe nyí wo oyén a/ró banshâng bakye, a-tî banet eyên ké esí ebe, ne eringe nyí a/kye eshê ányi busông a-chi nyí eyên e-firi ké byiko ebe.

³ Banet eyên ba*da/kúng bushwám ebe ne ba-kpógê esí ányi ba-koo*. Ba*da/koo kányí ké busa ḿbú ebe*. Kyi/mû ké bubwô eyên ne busa eyên ne osêt mú a/sét kámbé ntûntû a/fu, wo oyén a-kyú u ne mbé nké kyi/tông kyi/fu, mbé mbe ba-jê ng ǒ.

⁴ Wo a-chi i Otu [ne Osówo ejí. Wo amu a-chi i] banet eyên ba-kpógê,

⁵ ne ké busa eyên, be byimu byi-kpógê ng banet-bushwôn eten.

⁶ Me nn*fé dyityém ké búre ejí* nang ké kashwám ejí* n/fu, byi-nyii ng mě*.

⁷ Nké wo aa/nyii bě ké abwô nyí banet-bushwôn eten, a-kpógê banet ḿbé be byimu byi-sa ng kámbé kafâ.

⁸ Be byi-kyâ ǒ akpee kángkáng nkéré, ne byi-kó ng ǒ asǎma ne banyá.

⁹ Nké kántîk, wo aa/né bě a-mîng ba-kpógê bě. Wo a*fí to a-dim m byití ne bannwa byití eten*.

¹⁰ Wo a/chi bě byi-chêe banet-bushwôn eten, ne mbé ba/yip byěm ḿbyí byi/mû ḿbyí eten byi-firi ḿbyí ebe.

¹¹ Wo a/bángê ba-ju bě wǎ ebû. Wo a/chi bě byi-firi byiryibyiryi ké eshê-banet.

¹² Wo a/shee banet eyên ké boǒnyín-akpuga [éné wǎ a/kabe a/fu, mbé ba*da/jang ebyí chwǒm*.]

¹³ Barî-banet eten mbe ba-ri ng ńkyí wo a/chi bě, ne mbé mbe ba-fát ng bě kiikuku, ne mbe ba-jwó ng bě.

¹⁴ Wo aa/chi bě byi-firi chwǒm ńkyí banshâng bakye badakúng dángé. Byi/firi kámbé chwǒm-éjwô.

¹⁵ Me n/firi banet ké achi dángé kángkáng nkéré. Éshwân ee/cít mě bushú kángkáng

¹⁶ ké byiraa ejwo ḿbyí edángé ne ḿbyí ecábé ḿbyí banet-bushwôn ejí ne banet ḿbé me mu n-sa ng kámbé kafâ.

¹⁷ Ḿbyín kángkáng bii/chi bě be nang ké byi*da ǒ eráp ne* byi-bên ocím eyên mú byi/ryí ǒ byi-sem dyizîn eyên.

¹⁸ Be byi*da/né dyityém efé ne wo*. Be byi*da/né ne echi ńkyí wo a/sét*.

¹⁹ Nang ké nkyi éné, wo a/mîng bě abwô dyikáá byi-firi ké bubwô ḿbú byibî-enyam. Wo a/mîng bě ké kyifip ńkyí kyi/jîi kyi-shwôm.

²⁰ Â be byi/mû bii/mîng Osówo eten ofê ekye, byi-kûfé nshwam byi-kyâ osówo mú eshê ekíri,

²¹ wo ké ntûntû, něen a/mû aa/nyît kánkyí, ké nǎ, wo amu a-nyît ng ekabe nyí ké kafâ-atyém eten.

²² Nké nkyi ké dyishí eyên nké mbe ba-ju ng bě kángkáng nkéré, ba-chi i bě wǎ ebû nyí mbe ba-wâa ng edaju.

²³ Óburúkpâbí, bûu. Ebóng ńkyí wo amu a-rê ng. Bûu, wo oyén. *Da bě ené ne banyá*.

²⁴ Ebóng ńkyí wo amu a-rem m bě. *Daráp busông ne afaníkong eten*.

²⁵ Ké nǎ, be bii/myii ba-shiryi bě ba-fé kyísí. Be baa/kpógê bě ba-ren bě ké édúkǎndú.

²⁶ Bâ a-chwáp bě. Nyii bě ké bubwô-kyijé eyên ńkyí kii*man*.