SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 40 - Bokyi Bible

Okwan-Akpee

¹ Me m/bám kanong kanong n/fu, ochwâp mú Óburúkpâbí obâ. Nyǐ o/jwo mě, o-jwo to bukyû ejí ḿbú mu n-tii ng.

² Nyǐ o/tut mě o-fîm ké kyibî-dyibíng, o-fîm mě ké dyibíng-bukyû ńdyí biǐntóng biintong. Nyǐ o/yip mě o-twôom kanong ké buká, o-chi mě n-fem.

³ Nyǐ o/tángê mě n-kwán okwan mú ofyîfî, okwan-akpee mú ndakye Osówo eten. Banet chwóó ḿbé ba/ri ńkyín ba/chi ba-firi ké bushî, ne mbé ba/chi ba-tî atyém ebe ké Óburúkpâbí.

⁴ Bunyîn-dyityém mbu ne onet mú o*fí o-bírî ng o-kâm erím-bakye* o-kâm nang banet ḿbé mbe ba-fâ esówo nyí e*fí ké kafâ* nké mu o-tî ng dyityém emen ké Óburúkpâbí.

⁵ Osówo Óburúkpâbí eten, wo aa/chi byěm chwóó a-kye bě. Wo a*fí ne nkan-onet*. Wo aa/kabe biǐtí-byěm chwóó a-tî bě. Me mm*man eraa kyi-kim ne mbyí kángkáng* ké nǎ, mbyí byi/jê byi-shwôm.

⁶ Wo a*fí a-ryuu ng a/fu, bakûchi byifen ba-kyâ ǒ* nang eyáré ekye*. Wo a*da/bí a/fu, bakûshí byirim-byitú byimúmú ké kyikit-kyifen eyên echi* nang byifen echi ḿbyí byidafîm byibî*. Nké wo a/bwa a-kye mě atông nyí nda ǒ ejwo.

⁷ Ké bubwô ámbu kâng, n/faa n/fu, dǐi me nyín i. [Byěm ḿbyí amu a-ryuu ng a/fu, me nchi, ba/sáng kámbyí ké Nwet-Byije-Músis.]

⁸ Osówo ejí, nkyi kyi-nyîn n mě echi ńkyí amu a-ryuu ng. Me mu n-fâ ńkyí amu a-tángê e mě ké dyityém ejí.

⁹ Óburúkpâbí, me mm/pem ké ncibi mú kángkáng banet eyên n/fu, wo a/nyii bě. Wo amu a-nyît ng a/fu, me mm*ba/chi m-mîng kánkyí esét*.

¹⁰ Me n*da/mîng bǎmpém kyi-kim ne onyii mú wo a/nyii bě ba-waa ne me*. Me mm/pem kángkáng nkéré kyi-kim ne ochwâp eyên mú oo*man*. Me n*da/cíbî ne pyêp* ké ncibi mú banet eyên kángkáng* ké osêt kyi-kim ne ochwâp eyên ne kyijé eyên ḿbyí bii*man*.

¹¹ Óburúkpâbí, me mu n-nyît ng n/fu, wo aa*ba/chi a-mîng mě bafip eri*. Kyijé eyên ne ochwâp eyên bii*bángê chwǒm kyi-ta mě ne banyá*.

Nshwam-Ochwâp

¹² Afaníkong chwóó aa/wâng mě. Aa*nwa epan*. Byibî ejí bii/shwôm mě busa, ne n*fí to n-rángê e*. Mbyí bii/jê byi-shwôm eji nyí nyi mě ké dyishí. Bii/jwâa mě asa.

¹³ Óburúkpâbí, nyii mě. Chwáp mě kántîk.

¹⁴ Kyi/bát Osówo okpógê o-byiryi banet ḿbé mbe ba-kan n ba/fu, mbé ba-ju ng mě. Kyi/bát Osówo oró banet ḿbé mbe ba-jêe ng ké afaníkong ejí, o-wuri kámbé éshwân.

¹⁵ Kyi/bát okpóge mú Osówo o/kpógê banet ḿbé mbe ba-fât ng mě kiikuku ochi kámbé ba-waa ocím ké dyishí fúú.

¹⁶ Kyi/bát kángkáng banet ḿbé mbe ba-bâ ba-kâm ǒ bajêe ne bunyîn-dyityém. Kyi/bát kángkáng banet ḿbé mbe ba-kó ng ǒ asǎma ké onyii eyên bakûraa ba/fu, Óburúkpâbí o/rêe o-shwôm.

¹⁷ Óburúkpâbí, me busa bu*fí mě* chwǒm kyi*fí mě*. Nké wo a*da mě eráp ne*. Wo a-chi i Osówo ejí ne Onet-Onyii ejí. Bâ babap a-chwáp mě.