SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 39 - Bokyi Bible

Nshwam mú Onet mú mu o-ri ng Busông

¹ Me n/raa n/fu, me m-bám m byiko ké ńkyí mu n-chi i. Mm*ba/chi m-bángê kabyíbabang ejí ka-chi mě n-chi kyibî*. Me mm*ba/chi n-fu nang chwǒm ké nkéré byibî-banet mbyi fáráng*.

² Me n/cíbî pyêp, ojá n*fí n-faa ng* kyi-kim nang ne chwǒm ńkyí kyinong*. Nké busông ejí bu-bwa ng bu-jê ojéng bu-shwôm,

³ ofong o-kpet mě ekédê. Â m/bwa n-kabe n-shwôm, ányi nké ndakye dyityém ejí afaníkong a-shwôm oshwóm, ne m-kpet kâng ebí n/fu,

⁴ Óburúkpâbí, me m-kpen n ka-rí nǎ. Me m-kpú u nkéré orá. Sét mě nkéré mú dyikpen ejí dyi/chi dyi-man.

⁵ Wo aa/chi dyikpen ejí kaǎkímékímê. Ké bushú eyên, nkéré mú ndakpen o*fí wǎ chwǒm*. Ké ntûntû, onet nang orá mu wǎ kiǐnjáng.

⁶ Ké ntûntû, onet mu wǎ kiǐríribí. Kángkáng byěm ḿbyí nyǐ mu o-chi i mu o-chi i dyikáá. Nyǐ mu o-wuri ng esang, nké nyǐ o*fí o-nyît ng onet mú o/chi o-kúng kányí*.

⁷ Óburúkpâbí, ebóng kâng ńkyí me n/chi n-tî achi. Me mu n-tî ng achi ké wo.

⁸ Nyii mě ké kángkáng byibî ejí. *Damîng enyam-banet e-jwó mě*.

⁹ Me n-cíbî ng pyêp. Nn*faa ojá* ké nǎ, wo nké a/chi mě a/fu, me nri busông něen.

¹⁰ *Da mě echîkye busông a-ca kashú*. Me n-kú m-bâ ekpú ké byimirî eyên.

¹¹ Wo amu a-kyâ onet busông ké byibî emen ké kyiraa eraa ne nyǐ, ne wo a-bên n ńkyí nkyi kyi-jê ng ǎ wǎ eringe ebá edabên byěm. Ké ntûntû, onet mu wǎ kiǐnjáng.

¹² Óburúkpâbí, jwo nshwam ejí. Fwôo atông a-jwo bukyû ejí ḿbú mu n-tii ng. Bâ a-chwáp mě ké nkéré n-kú n-tii ng bukyû. Me mu ǒ ocinónet ké kaǎnyín-nkéré wǎ kángkáng banchí ejí ḿbé kpákpá.

¹³ Zú mě abwô eringe nyí ndari bunyîn-dyityém ne n-kûdim nn*kyú to*.