SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 37 - Bokyi Bible

Dyikpen ńdyí Byibî-Banet ne ńdyí Banet ḿbé Banong

¹ *Da n̂g ekérê kyi-kim ne byibî-banet*. Orêm o*da běn echi kyi-kim ne byibî-banet*.

² Ké nǎ, mbé ba/chi ba-rím babap wǎ biǐbyâa ne byichí ḿbyí byidashí ḿbyí ké nkéré burwom.

³ Tî n̂g dyityém ké Óburúkpâbí ba-chi ńkyí nkyi kanong, eringe nyí badakyú ké bunyîn-dyityém ké esí nyí nyǐ o/ryí běn ocím.

⁴ Óburúkpâbí okyú bunyîn-dyityém enen ne nyǐ o/chi o-kye běn ńkyí bamu ba-ryuu ng.

⁵ Kúng n̂g byiko enen ba-kye Óburúkpâbí. Tî n̂g atyém enen ké nyǐ, ne nyǐ o/chi o-chwáp běn.

⁶ Nyǐ o/chi o-chi kanong enen ka-firi wááng wǎ kiinwángé, ne kanong enen echi ka/chi ka-kûsan wǎ esû nyí busun mánmán.

⁷ Kyú n̂g beem ké bushú ḿbú Óburúkpâbí, ba-bám ǎ o-chi ńkyí nyǐ mu o-ryuu ng. *Da n̂g ekérê kyi-kim ne banet ḿbé ka/nwa kámbé* nang kyi-kim ne banet ḿbé mbe ba-câ kashú ne byěm ḿbyí byibî-ekabe ebe*.

⁸ *Da n̂g esa kafâ*. *Da n̂g ekérê*. Kanong ka*fí ányi*.

⁹ Banet ḿbé mbe ba-tî ng atyém ebe ké Óburúkpâbí ba/chi ba-já esí nyí Óburúkpâbí o/ryí ocím. Nké Óburúkpâbí o/chi o-ró byibî-banet.

¹⁰ Ké kaǎnyín-nkéré byibî-banet byi/chi byi-rím. Ba-man n ekyé kámbé, nké baa*ba/chi ba-ri kámbé*.

¹¹ Nké banet ḿbé mbe degere ba/chi ba-já esí nyí Óburúkpâbí o/ryí ocím, ba-já to byěm chwóó.

¹² Kyibî-onet kyi-pám m onet mú mu o-chi i kanong, o-tún n ǎ byibî-achi ne dyityém-busa.

¹³ Óburúkpâbí o-jwó ng kyibî-onet ánkyi, ké nǎ, mu o-nyît ng o/fu, kyibî-onet ánkyi kii*bwon ne kyi-tánê*.

¹⁴ Byibî-banet mbe ba-zú ng bushwám ebe ba-sep ng báre ebe, eringe nyí mbé badaju banet-kyikpu ne ḿbé ba*fí ne chwǒm* ne eringe nyí mbé badaju banet ḿbé mbe kanong.

¹⁵ Nké mbé bushwám ebe bu/chi bu-ju kámbé mbé bayén, ne báre ebe ba/chi ba-byíryî cogecoge.

¹⁶ Kaǎnyín ńké onet mú kanong mu ne nké nke kiǐtí ka-shwôm kángkáng efang nyí byibî-banet,

¹⁷ ké nǎ, Óburúkpâbí o/chi o-bún acit nyí byibî-banet. Nké o/chi o-ku banet ḿbé mbe kanong.

¹⁸ Óburúkpâbí o-nen n banet ḿbé mbe ba-chi i ńkyí nyǐ o/sét, ba/chi ba-já esí nyí Óburúkpâbí o/ryí ocím.

¹⁹ Mbé baa*ri afaníkong ké kyibî-nkéré*. Mbé ba-já ng ńkyí kyidakwárê kámbé ké nkéré mú kyifang.

²⁰ Nké byibî-banet ba/chi ba-kpú. Banet-bushwôn ḿbé Óburúkpâbí ba/chi ba-shí wǎ ekong-biǐbyâa. Mbé ba/chi ba-rím wǎ arúkwâ.

²¹ Kyibî-onet kyi-pwoo ng, kii*só*. Nké onet mú mu kanong o/cángê dyityém ne o-yárê ng banet.

²² Banet ḿbé Óburúkpâbí o/jware kámbé ba/chi ba-já esí nyí Óburúkpâbí o/ryí ocím. Nké Óburúkpâbí o/chi o-ró banet ḿbé nyǐ oo/shú.

²³ Óburúkpâbí o-tông ng onet kyiká-bucen ńkyí odakúng, ne o-bám m onet mú mu o-nyîn n ǎ dyityém.

²⁴ Nang onet ámu o-róng, oo*waa kyísí* ké ebóng, Óburúkpâbí o-chwáp ng ǎ o-bûu.

²⁵ Me kántîk nn/kâa, n*fí to wǎsíng* nké n*da/ri ne onet mú mu kanong mú Óburúkpâbí oo/bírî ǎ esim* n-ri nang bwǎn emen ba-rém byiryíng*.

²⁶ Kángkáng nkéré, onet mú mu kanong o-yárê ng byěm, ne o-pwoo ng banet byěm, ne bwǎn emen ba/firi ǎ ojware mú Osówo.

²⁷ Mîng n̂g byibî-byěm echi ba-chi kanong, ne bwǎn enen ba/chi ba-kyú kángkáng nkéré ké esí nyí Óburúkpâbí o/ryí běn ocím.

²⁸ Ké nǎ, chwǒm ńkyí nkyi kanong kyi-jê ng Óburúkpâbí, ne nyǐ oo*bírî banet ḿbé ba/fé dyityém ne nyǐ esim*. Nyǐ o-ku ng kámbé ne banyá. Nké Óburúkpâbí o-ró ng bwǎn ḿbé byibî-banet.

²⁹ Banet ḿbé mbe ba-chi i kanong ba/chi ba-já esí nyí Óburúkpâbí o/ryí ocím, ba-kyú ké nyǐ ne banyá.

³⁰ Ejá nyí onet mú mu kanong nyi nyí bubong, ne onet ámu o-raa ng ńkyí nkyi ntûntû.

³¹ Nyǐ o-tî ng byije ḿbyí Osówo emen ké dyityém ne oo*mîng kámbyí cát ne banyá*.

³² Kyibî-onet kyi-kpúrî ng onet mú mu kanong ne kyi-kan n kyi/fu, nkyí kyi-ju ng ǎ.

³³ Nké Óburúkpâbí oo*bángê onet mú mu kanong o-róng ké abwô nyí onet-bushwôn emen* o-mîng nang ba-két mpan o-bên ǎ nkéré mu ké mpan*.

³⁴ Tî n̂g okabe enen ké Óburúkpâbí ba-chi wǎ eringe nyí byije emen byi/sét. Nyǐ o/chi o-chi běn ba-kyú ne ofê nkéré mú baa/já esí nyí nyǐ o/ryí ocím. Ne ben ba/chi ba-ri Óburúkpâbí o-ró byibî-banet.

³⁵ Me nn/ri kyibî-onet ńkyí kyi/mû kyi/bên dyityém. Nkyí kyi/mû kyi/nárê kyi-shwôm nang yeě, éné wǎ dyisín-kyichí ńkyí badakó séda ńkyí nkyi ké Lebánon.

³⁶ Nké ńdyí n/chîshwôm ányi, nyǐ o*fí to*. Me n/kyé ǎ, nké n*da ǎ echîri*.

³⁷ Kpúrî onet mú onong a-kabe kyi-kim ne onet mú mu o-chi i kanong. Onet mú o/nwa dyityém o-kyú u ne bwǎn.

³⁸ Nké Óburúkpâbí o-ju ng banchi byibî, ne o-shiryi ng kángkáng bwǎn ebe.

³⁹ Óburúkpâbí o-nyii ng banet ḿbé mbe ba-chi i kanong, ne o-ku ng kámbé ké nkéré mú afaníkong.

⁴⁰ Óburúkpâbí o-chwáp ng kámbé ne o-nyii ng kámbé to. O-nyii ng kámbé ké abwô nyí byibî-banet, ké nǎ, mbe ba-rem m ké busi emen.