SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 36 - Bokyi Bible

Dyityém ebên ńdyí Banet

¹ Kyibî kyi-raa ng ne mbên dyityém ké kafâ-dyityém emen. Nyǐ mu o-né ng Osówo ne oo*kye ǎ ofê*.

² Nyǐ mu o-kabe ng o/fu, Osówo oo*ba/chi o-ri kyibî emen o-két mpan o-bên ǎ* ké nǎ, nyǐ mu o-kabe ng o/fu, nyǐ ké byiko emen o/rêe o-shwôm.

³ Byiraa emen bii*nwa* ne mbyi byisédéng byísedeng. Nyǐ o*fí to o-chi i ńkyí nkyi ne bubong* ne ńkyí nkyi kanong*.

⁴ Nyǐ o-kabe ng kyibî-okabe ké nkéré oo/rí sáre. Chwǒm kyi*fí ńkyí nyǐ mu o-chi i ńkyí nkyi kanong* ne oo*né chwǒm nang kyibónge ńkyí nkyi kyibî*.

Dyityém enwa ńdyí Osówo

⁵ Óburúkpâbí, kyijé eyên ńkyí kii*man* nkyi kyi-ribi ng kyíbóng. Ocím eyên etî mú a/ryí mu o-ribi ng kyíbóng.

⁶ Kanong eyên ńké amu a-chi i ka/nárê wǎ eku. Mpan eyên mú acît a*fí* o/ríbî wǎ buríbi-baya ḿbé baryên. Banet ne enyam mbyi ké abwô eyên. [

⁷ Ô Osówo, kyijé eyên ńkyí kii*man* kyi/nwa kyi-shwôm. Be byimu byi-ri ng] kyikit-dyirem ké dyifít-kiǐríribí-abyibabang eyên.

⁸ Be byimu byi-ryí i bujê-byiryíng eyên ḿbyí amu a-kyâ, a-mîng bě byi-jwáp omu ké kace ńké kanong eyên.

⁹ Kángkáng akpen nyi a-fím m ne wo, ne be byimu byi-ri ng kiinwángé ké bubwô ḿbú kiinwángé eyên.

¹⁰ Kûjê banet ḿbé mbe ba-nyît ng ǒ a-câ kashú. A-chi kanong a-kye banet ḿbé mbe ba-chi i kanong.

¹¹ *Damîng bantông byiko ba-bírî bunwa ne me* nang bambên atyém ba-chi mě n-chêe*.

¹² Ri n̂g kyikit ńkyí banchi byibî baa/róng. Mbé baa/waa ányi kyísí, baa*man to ebûu*.