SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 33 - Bokyi Bible

Okwan-Akpee

¹ Ben kángkáng mú bamu ba-chi i kanong, jêe n̂g ké ńkyí Óburúkpâbí oo/chi. Ben kángkáng mú bamu ba-chi i ńkyí nyǐ o/sét, kpee n̂g ǎ.

² Kim m̂ ácîng ba-kó Óburúkpâbí asǎma. Kim m̂ ácîng ba-kwán ekwan ba-kye ǎ.

³ Kwán n̂ okwan mú ofyîfî ba-kye ǎ. Kim m̂ ácîng kanong kanong, ba-kwán kyíbóng kyíbóng.

⁴ Ejá nyí Óburúkpâbí nyi ntûntû ne kángkáng bǎmkpóngé emen o/chi kámbé ne dyityém emen.

⁵ Banet ḿbé mbe ba-chi i kanong ne baa*ryí acît* ba-jê ng Óburúkpâbí. Kyijé ńkyí Óburúkpâbí nkyi pwat ké ejíí kángkáng nkéré.

⁶ Óburúkpâbí o/chi bubóng ké busa-ejá emen. O/chi óbyísû ne otukáku ne ékpére ké ejá emen.

⁷ Nyǐ o/kpaa kángkáng buce o-tî kyikit kyibónge o-kpaa baya o-fín ké kafâ-banfût emen kyísí.

⁸ Ejíí emúmú, shî n̂g Óburúkpâbí. Kángkáng banet ḿbé ké ejíí, shî n̂g ǎ.

⁹ Ké ejá emen nké nyǐ o/chi ejíí ne kángkáng byěm ḿbyí mbyi ké nyǐ.

¹⁰ Óburúkpâbí o-bên n okabe mú banet-ejíí. Oo*bángê kámbé ba-chi eringe nyí ba/nam*.

¹¹ Nké okabe mú Óburúkpâbí o-waa ng ne banyá, o*fí ne nkuli kyikû*.

¹² Bunyîn-dyityém mbu ne oshê mú Osówo ebe mu Óburúkpâbí. Bunyîn-dyityém mbu ne banet ḿbé Óburúkpâbí o/cá kámbé.

¹³ Óburúkpâbí mu áku kyíbóng o-ri ng kángkáng banet kyísí.

¹⁴ Áku ké kyikit ńkyí nyǐ mu Otu nké mu o-ri ng kángkáng banet ḿbé mbe ké ejíí.

¹⁵ Nyǐ nké mu o-chi i kángkáng atyém ebe ne mu o-nyît ng kángkáng byěm ḿbyí mbé mbe ba-chi i.

¹⁶ Otu oo*kpógê byití ké bubwô-bannwa byití emen ḿbé mbe ne busa*. Nnwa byití oo*kpógê byití ké bubwô-busa ḿbú nyǐ mu ne mbú*.

¹⁷ Bubyî-orá ḿbú byití enwa boo*chwáp ké byití ekpógê*. Kiǐtí-busa ebe kii*man echwáp*.

¹⁸ Óburúkpâbí o-bám m banet ḿbé mbe ba-shî ng ǎ, o-bám m banet ḿbé mbe ba-tî ng dyityém ké kyijé emen ńkyí kii*man*.

¹⁹ Óburúkpâbí mu o-nyii ng kámbé ké bukyû, mu o-nen n kámbé ké kyifang.

²⁰ Be byimu byi-tî ng achi ké Óburúkpâbí. Nyǐ nké mu bě Onet-Onyii ne Onet-Ochwâp.

²¹ Be byimu ké bunyîn-dyityém ké bubwô emen. Be byimu byi-fâ dyityém ké dyizîn emen ńdyí dyinong.

²² Óburúkpâbí, kyi/bát kyijé eyên ńkyí ne banyá kyikyú ne be eringe nyí byimu byi-tî ng achi ké wo.