SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 32 - Bokyi Bible

Byibî esét ne Opwoo-Byibî

¹ Bunyîn-dyityém mbu ne onet mú Osówo oo/pwoo ǎ byibî. Bunyîn-dyityém mbu ne onet mú Osówo oo/shî ǎ byibî.

² Bunyîn-dyityém mbu ne onet mú Óburúkpâbí o/fu, o*da/chi kyibî-chwǒm*. Bunyîn-dyityém mbu ne onet mú o*fí ne kaǎnínǐm ké dyityém*.

³ Me m/mû nn/kyee ké bukyû ḿbú mu n-tii ng kángkáng dyicí ké nkéré mú n*da/sét byibî ejí*.

⁴ Óburúkpâbí, buchú ne esû, wo a/mû a-kyâ mě busông. Busa ejí boo/man mě kángkáng éné wǎ biǐntóng ḿbyí byidaman ké burwom.

⁵ Ne n-sét ǒ kâng byibî ejí. N*da/cít kámbyí*. Me m/bángê n/fu, n-sét ng ǒ kámbyí. Ne wo a/pwoo mě ké mbyí.

⁶ Ké bubwô ámbu kâng, nang yeě mú mu o-nyît ng ǒ ofé nshwam o-kye ǒ ké nkéré mú [afaníkong.] Eringe nyí kiǐsúsú-baya ńkyí nkyi kyi-bâ ne busa kii*kâm kámbé*.

⁷ Wo amu mě wǎ kyikit ńkyí ndarem. Wo a-nyii ng mě ké afaníkong. Me mu n-kwán n kyíbóng kyíbóng kyi-kim ne onyii eyên, ké nǎ, wo amu a-ku ng mě.

⁸ Óburúkpâbí mu o-raa ng o/fu, me n/chi n-tángê ǒ bukwóp ḿbú wo adace. Me n/chi n-tángê ǒ n-kye ǒ bacê.

⁹ *Daróng enyam wǎ kabyî-orá* ńké badafé kánké kaǎkím-kaǎré ké ocím* eringe nyí kadachi ńkyí wo amu a-ryuu ng*.

¹⁰ Banchi byibî ba/chi ba-ri busông. Nké kyijé ńkyí Óburúkpâbí ńkyí kii*man* kyi/chi kyi-nyii banet ḿbé mbe ba-tî ng dyityém ké nyǐ.

¹¹ Kángkáng banet ḿbé mbe ba-chi i kanong bajêe ba-kyú ne bunyîn-dyityém ké ńkyí Óburúkpâbí oo/chi. Kángkáng banet ḿbé mbe ba-chi i ńkyí nyǐ o/sét, jêe n̂g.