SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 30 - Bokyi Bible

Nshwam-Asǎma ekó

¹ Óburúkpâbí, me mu n-kyâ ǒ akpee, ké nǎ, wo aa/nyii mě ké abwô nyí banet-bushwôn ejí, ne aa/chi mě eringe nyí mbé baa*jêe ké orông ejí*.

² Ô Osówo Óburúkpâbí ejí, me n/tii bukyû n-kó ǒ n/fu, chwáp mě, ne wo a/nyángê mě.

³ Wo a/chi mě n-fem ké dyikun enung. Me m/mû n-kú n-cen n n-câ ḿbú oshê-bakúsí, nké wo a/nyii dyikpen ejí.

⁴ Kángkáng banet-Óburúkpâbí ḿbé banong, kwán n̂ ekwan-akpee ba-kye Óburúkpâbí. Zîim m̂ kanong ńké emen, ba-kó ǎ asǎma.

⁵ Dyityém emen dyi-sa ng ǎ ké kaǎnyín-nkéré, kanong emen ka-waa ng ké dyikpen eyên kángkáng. Nang batíí ba-byí ne buchú, bunyîn-dyityém mbu bu-bâ ké dyicófóróng.

⁶ Me m/mû n/ri n/fu, chwǒm kii*man mě eking* ne n-raa ké dyityém n/fu, me baa*kpógê mě ne banyá*.

⁷ Óburúkpâbí, wo a/mû kanong ne me. Wo a/ku mě wǎ kaku ńké shwaneshwane. Nké nang kyi/mû éné, wo a/rôo mě byiko eyên ne bushî bu/róng mě.

⁸ Me n/kó ǒ, ǎ Óburúkpâbí. N-tîm ǒ arông n/fu, chwáp mě.

⁹ Wo a-ryí i ebóng mpún ké bukyû ejí ekpú. Wo a-ryí i ebóng ké oryii ejí ké dyikun. Bakúsí ba-man n ǒ ekye akpee dí. Mbé ba-man n esét kyi-kim ne kanong eyên ńké kaa*man dí*.

¹⁰ Óburúkpâbí, jwo mě, ri mě bafip. Óburúkpâbí, chwáp mě.

¹¹ Wo aa/yángê bafip ejí ba-firi ane nyí bunyîn-dyityém. Wo aa/kúng bafip ejí a-wâng mě ne bunyîn-dyityém.

¹² Ké bubwô ámbu, me mm*ba/chi n-cíbî pyêp* me n/chi n-kye ǒ akpee ké ekwan ekwán. Óburúkpâbí, wo nké amu Osówo ejí. Me n/chi n-kó ǒ asǎma ne banyá.