SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 29 - Bokyi Bible

Ejá nyí Óburúkpâbí ké Bufú ḿbú Buryên

¹ Ben [byěm ḿbyí mbyi kyíbóng,] kye n̂g Óburúkpâbí akpee. Kpee n̂g busan emen ḿbú ragerage ne busa emen.

² Kye n̂g kiǐtí-dyizîn ńdyí Óburúkpâbí akpee. Tíngê ê kyísí ba-kye Óburúkpâbí ofê [ké nkéré oo/byí kyíjí.]

³ Mbe ba-jwo ng ejá nyí Óburúkpâbí ké baya ḿbé baryên. Osówo mú ragerage mu o-nyán n wǎ etare, ne ejá emen nyi e-byí i ké baya bamúmú.

⁴ Mbe ba-jwo ng ejá nyí Óburúkpâbí. Nyǐ nyi ne busa ne e/rêe.

⁵ Ejá nyí Óburúkpâbí nyi e-sé ng byichí. Nyi e-sé ng nang byichí ḿbyí Lebánon.

⁶ Nyǐ mu o-chi i eku nyí Lebánon e-nyíp ng kyíbóng wǎ boǒbwán-bampong, ne mu o-chi i kaku ńké Hémon ka-nyíp kyíbóng wǎ wǎn-mpong.

⁷ Ejá nyí Óburúkpâbí nyi e-chi i kasabang ka-kédê ng.

⁸ Ejá emen nyi e-chi i kyikim-dyikán kyi-náng. Nyǐ mu o-náng ng kyikim-dyikán ńkyí Kádyishi.

⁹ Ejá nyí Óburúkpâbí [nyi e-ninge e biǐsín-byichí] e-roo ng eshǎan e-pwó ng kyísí, ne kángkáng banet ḿbé mbe ké kafâ-kiǐtí-kyise-kyifen emen echi ba-wonge e ne ejá kyíbóng ba/fu, akpee akyú ne Osówo.

¹⁰ Biǐríbíríbí-baya mbyi ké bubwô-Óburúkpâbí. Nyǐ mu o-níbî ng kámbyí wǎ Otu.

¹¹ Óburúkpâbí mu o-kyâ banet emen busa, ne mu o-jware ng kámbé ne bunyîn-dyityém.