SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 27 - Bokyi Bible

Nshwam-Akpee

¹ Óburúkpâbí nké mu mě kiinwángé ne Onet-Onyii ejí. Me mm*ba/chi n-shî onet nang obónge*. Óburúkpâbí mu o-ku ng mě ké kángkáng afaníkong. Me mm*ba/chi n-shî*.

² Byibî-banet ba/chi ba-kpán ba-myii ké nkéré baa/rim bunwa ne me ba/fu, mbé ba-ju ng mě.

³ Me mm*ba/chi n-shî* nang bannwa byití chwóó nké ba/wâng mě*. [Me mm*ba/chi n-né Osówo*] nang banet-bushwôn ejí ba-rim bunwa ne me*.

⁴ Me mm/bí Óburúkpâbí chwǒm kyibónge. Chwǒm kyibónge nké nke me mu n-ryuu ng. Me mu n-ryuu ng n/fu, nkyú ké kyise ńkyí Óburúkpâbí kángkáng dyikpen ejí, n-kûri kanong emen. N-kûkoo bacê ne nyǐ ké kiǐtí-kyise-kyifen emen echi.

⁵ Ké nǎ, nyǐ o/chi o-rôo mě ké kyise emen ké nkéré mú afaníkong. Nyǐ o/chi o-rôo mě ké kiǐtí-kyise-kyifen emen echi o-tî mě to kanong kanong ké buká ḿbú nyáám.

⁶ Ké bubwô ámbu, me n/chi m-kpógê banet-bushwôn ejí ḿbé ba/wâng mě. Me n/chi n-chi byifen ké kiǐtí-kyise-kyifen emen echi ne bunyîn-dyityém. Me n/chi n-kwán ekwan m-kpee Óburúkpâbí.

⁷ Óburúkpâbí, jwo mě ké nkéré n-kú n-kó ng ǒ. Ri mě bafip, a-faa mě ojá.

⁸ Óburúkpâbí, wo a/fu, me mbâ m-ba-kye ǒ ofê. Óburúkpâbí, me mu m-bâ.

⁹ *Da mě erem byiko eyên*. *Dasa kafâ ne me*. *Da mě eró* me mú ḿgbán eyên. Wo nké amu mě Onet-Ochwâp. Osówo, Onet-Onyii ejí, *da mě eró a-twóp*. *Da mě emîng*.

¹⁰ Bonchí ejí ne boné ejí ba-man n mě emîng, nké Óburúkpâbí o/chi o-nen mě.

¹¹ Óburúkpâbí, tángê mě ńkyí wo amu a-ryuu ng a/fu, me nchi, a-sí mě ké kiǐfáng ńkyí kyinong, ké nǎ, me mu ne banet-bushwôn chwóó.

¹² *Da mě emîng ne banet-bushwôn ejí* ḿbé mbe ba-kúng ng byisédéng ne achi epii ba-rim bunwa ne me*.

¹³ Ké ntûntû, me n/chi m-kpen n-ri kanong ńké Óburúkpâbí ké ejíí ńnyín.

¹⁴ Tî dyityém ké Óburúkpâbí. Fé dyityém ké nyǐ. Bwom shwaneshwane. Tî dyityém ké Óburúkpâbí.