SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 26 - Bokyi Bible

Nshwam mú Onet mú Onong

¹ Ô Óburúkpâbí, sét a/fu, me n*da/chi kyibî* ké ebóng, me mu n-chi i ńkyí nkyi kanong, ne me n/tî dyityém ké wo kanong kanong.

² Óburúkpâbí, pet mě a-kan mě. Pan okabe ejí ne byěm ejí eryuu mpan.

³ Kyijé eyên ńkyí kii*man* nké nkyi Onet-Obâm ejí. [Ocím eyên etî nké mu o-tông ng mě kiǐfáng kángkáng nkéré.]

⁴ Me n*fí n-cen n ne banet ḿbé ba*da/byí chwǒm*. Me n*fí ne chwǒm kyi-kim ne bannîm banet*.

⁵ Bucen ne byibî-banet boo*nyîn mě*. Mu n-ciring ng bambên atyém.

⁶ Óburúkpâbí, me mu n-soo ng abwô ejí eringe nyí ndatông n/fu, me n*da/chi kyibî* ne n-cen n ké kyikit ńkyí badachi kyifen eyên n-kyâ ǒ ofê n-wáp ng.

⁷ Me mu n-kwán n okwan-asǎma ekó n-sét ng ǒ kángkáng biǐtí-byěm eyên ḿbyí amu a-chi i.

⁸ Ô Óburúkpâbí, kyise eyên ńkyí amu a-kyú u ńkyí nkyi ne busan eyên ḿbú ragerage nkyi kyi-nyîn n mě.

⁹ *Da mě eju cibicibi ne banet-byibî*. *Da mě ekoo dyikpen ké bukyû ḿbú banju banet*

¹⁰ ḿbú banet ḿbé mbe ba-chi i byibî kángkáng nkéré* ne baa/kpá byiko kángkáng ḿbyí badakoo ngu*.

¹¹ Nké kyi-kim ne me, me mu n-chi i ńkyí nkyi kanong. Ri mě bafip, a-nyii mě.

¹² Wo a/chi mě n-fem ké kángkáng efene. Me mu n-kyâ Óburúkpâbí akpee ké ncibi mú banet emen.