SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 25 - Bokyi Bible

Nshwam ké Nkéré-Ofene

¹ Ô Óburúkpâbí, wo nké mu n-fâ nshwam ejí n-kyâ ǒ.

² Me n/tî dyityém ké wo mú amu Osówo ejí. *Dabángê ba-fé mě éshwân*. *Dabángê banet-bushwôn ejí ba-jêe ké orông ejí*.

³ Baa*kpógê banet ḿbé ba/fé dyityém ne wo*. Nké ba-kpógê ng banet ḿbé kii*sóng kámbé ebírî bunwa ne wo*.

⁴ Ô Óburúkpâbí, tông mě biǐfáng eyên. Chi mě n-nyît kámbyí.

⁵ Tángê mě eringe nyí ndacen ké kiǐfáng eyên ńkyí ntûntû, ké nǎ, wo nké amu Osówo ejí mú mu o-nyii ng mě. Me mu n-fâ dyityém ne wo kángkáng nkéré.

⁶ Ô Óburúkpâbí, zîim dyityém ecángê eyên ne kyijé eyên ńkyí kii*man* ḿbyí aa/tông kyi-fím ké nkéré mú o/shwôm ké esim.

⁷ Pwoo mě ké byibî ejí ne byěm ejí ḿbyí n*da/man echi ne dyikwá*. Óburúkpâbí, zîim mě ké bubwô ḿbú kanong eyên ne kyijé eyên ńkyí kii*man*.

⁸ Óburúkpâbí mu o-tángê e banchi byibî kiǐfáng ńkyí mbé badacen, ké nǎ, nyǐ mu o-chi i kanong ne o/nwa dyityém.

⁹ Nyǐ mu o-tông ng banet ḿbé mbe degere kiǐfáng ńkyí ntûntû, ne mu o-tángê e kámbé ńkyí nyǐ mu o-ryuu ng.

¹⁰ Nyǐ mu o-tông ng kángkáng banet ḿbé mbe ba-tî ng byije emen ne ocím mú nyǐ o/ryí ne mbé ba-sem byiko emen biǐfáng, oo*kyee ne kyijé ńkyí kii*man*.

¹¹ Óburúkpâbí, tî ocím eyên mú a/ryí, a-pwoo mě byibî ejí, ké nǎ, mbyí byi/jê chwóó.

¹² Banet ḿbé mbe ba-chi i ńkyí Óburúkpâbí o/sét ba/chi ba-kwâa kiǐfáng ńkyí mbé badacen ne nyǐ.

¹³ Mbé ba/chi ba-já byěm kángkáng nkéré, ne esí e/chi e-firi nyí bwǎn ebe.

¹⁴ Óburúkpâbí o-ryí i bucín ne banet ḿbé mbe ba-chi i ńkyí nyǐ o/sét, ne mu o-tî ng ocím emen mú nyǐ o/ryí ne mbé o-sem byiko emen.

¹⁵ Me mu n-tî ng Óburúkpâbí achi kángkáng nkéré n/fu, ochwáp mě, ne nyǐ mu o-nyii ng mě ké ofene.

¹⁶ Óburúkpâbí, bírî a-kâm mě a-ri mě bafip, ké nǎ, me mu kǎnchí ne mu kyeekyee.

¹⁷ Fîm mě ké káryúryú ejí, a-nyii mě ké kángkáng afaníkong ejí.

¹⁸ Kabe kyi-kim ne bafip ne afaníkong ejí, a-pwoo mě ké byibî ejí kángkáng.

¹⁹ Ri to eringe banet-bushwôn ejí ba/jê. Ri eringe busa-dyityém ebe ne me bu/jê.

²⁰ Ku mě a-nyii mě. *Dabángê ba-kpógê mě*. Me m/bê n-kâm ǒ eringe nyí ndafem.

²¹ Kyi/bát [kanong eyên ne ntûntû eyên] byitî mě kanong, ké nǎ, me n/tî dyityém ké wo.

²² Ô Osówo, nyii banet-Ézerel eyên ké kángkáng afaníkong ebe.