SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 22 - Bokyi Bible

Bukyû etii ne Okwan-Akpee

¹ Osówo ejí, ebóng ńkyí wo aa/mîng mě. Me nn/tîm ǒ arông ne bayit n/fu, chwáp mě. Nké ochwâp eyên o*fí o-bâ*.

² Osówo ejí, me mu n-kó ng ǒ ne esû. Nké wo a*fí a-faa ng mě ojá*. Me mu n-kó ng ǒ to ne bushú, dyijâng dyi*fí*.

³ Wo nké ba/kúng ǒ butu. Wo kǎnchí nké amu kanong. Wo nké banet-Ézerel mbe ba-kpee ng.

⁴ Wo nké banchí eten ḿbé kpákpá ba/tî dyityém ebe. Mbé ba/tî atyém ké wo, ne wo a/nyii kámbé.

⁵ Mbé ba/kó dyizîn eyên, ne wo a/chi kámbé ba-fem. Mbé ba/tî dyityém ké wo, ne kyi*da/waa kámbé kyísí*.

⁶ Nké me n*fí to onet*. Me n/firi bunyabang ḿbú boo*nyîn banet dyityém*.

⁷ Kángkáng banet ḿbé mbe ba-ri ng mě mbe ba-fát ng mě kiikuku. Ba-raa ng ocím ne me ba-ninge e ashí.

⁸ Ba-raa ng ba/fu, wo a/tî dyityém ké Óburúkpâbí, ebóng Óburúkpâbí oo*nyángê ǒ*. Â wo a-nyîn n Óburúkpâbí, ebóng ńkyí nyǐ o*fí o-chwáp ng ǒ*.

⁹ Óburúkpâbí, wo nké a/chwáp ne ba-fwon mě. Wo nké a/nyii mě ké afaníkong ké nkéré m/mû ké abwô.

¹⁰ Me nn/tî dyityém ké wo kyi-fím ne dyikwá. Wo aa/kyú Osówo ejí kyi-fím ké nkéré m/mû ké abwô.

¹¹ *Da mě ekyú tete* ké nǎ, afaníkong nyi fáráng. Onet nang obónge o*fí mú oda mě echwáp*.

¹² Banet-ociring baa/wáp mě ba-fé ké kafâ wǎ biinyinyǎm. Mbé kángkáng mbe mě byicê byimúmú wǎ biinyinyǎm ḿbyí byi/fím oshê mú Báshan.

¹³ Ba-jaa ng ecím ba-ját ng mě asháng ké byiko ba-fém m wǎ ekpang.

¹⁴ Busa ejí boo/man. Boo/man éné wǎ omu mú ba/pwó kyísí. Byikúú ejí kángkáng bii/zóngê. Dyityém ejí dyi/firi éné wǎ burwan nké mbu bu-nyange e mě ké kafâ. [

¹⁵ Omiríng] ejí oo/jwóm éné wǎ édúkǎndú, ne kabyíbabang ejí kaa/lák ké biǐnzóngé. Wo a/fu, me nwaa ké édúkǎndú m-kpú.

¹⁶ Bujê-banet-byibî ba/wâng mě, ba-tín n ba-fárâng ng mě wǎ bubyî-kyifún. Mbé [mbe ba-ját ng] mě byiká ne abwô.

¹⁷ Byikúú ejí kángkáng byi/firi kyíjí. Banet-bushwôn ejí ba/mé mbe ba-tún n mě.

¹⁸ Mbé baa/kyii barî byídí ejí ké dyímám etwóp.

¹⁹ Óburúkpâbí, *da mě ebwom cát*. Onet-Onyii ejí, bâ babap a-chwáp mě.

²⁰ Óburúkpâbí, *dabángê ba-kpet mě ba-ju*. *Dabángê bubyî ḿbún bu-man dyikpen ejí*.

²¹ Nyii mě ké abwô nyí byibî-ekpang ḿbyín. [Me n*fí ne busa] ké etwóm nyí biinyinyǎm ḿbyín*.

²² Osówo, me n/chi m-pem bwǎn-bané ejí kyi-kim ne ńkyí wo aa/chi. Me n/chi m-kpee ǒ ké nkéré ba-kú ba-kyâ ǒ ofê.

²³ Bǎmgbán-Óburúkpâbí, kye n̂g Óburúkpâbí akpee. Banet-kyikû-Jekôp, kye n̂g Óburúkpâbí ofê. Banet-Ézerel, tíngê ê kyísí ba-fé Óburúkpâbí.

²⁴ Óburúkpâbí o*fí o-kám m banet-kyikpu fúú* nang busông ḿbú mbe ba-ri ng bu-chi ǎ o-né kámbé. Nyǐ o*fí o-bírî ng kámbé esim*. Nké nyǐ mu o-faa ng kámbé ké nkéré ba-kú ba-ryuu ng ochwâp.

²⁵ Ké nkéré banet eyên ba-kú ba-kyâ ǒ ofê, me n/chi m-kpee ǒ ké ńkyí aa/chi. Ké bushú ḿbú banet kángkáng ḿbé mbe ba-chi i ńkyí wo a/sét nké me n/chi n-chi byifen-Osówo ḿbyí me n/ryí ocím.

²⁶ Banet-kyikpu ba/chi ba-ryí eringe nyí mbé mbe ba-ryuu ng. Banet ḿbé mbe ba-bâ ba-kâm Óburúkpâbí ba/chi ba-kpee ǎ. Kyi/bát bakyú kanong ne banyá.

²⁷ Kángkáng banshâng bakye ké ejíí emúmú kyi-fím ké bukô-ejíí bubónge kyi-ribi ké ḿbú áku ba/chi ba-zîim Óburúkpâbí ba-bírî ba-kâm ǎ. Kángkáng banet ba/chi ba-kye ǎ ofê.

²⁸ Ké nǎ, Óburúkpâbí nké mu Otu. Ejíí emúmú nyi ké bubwô emen.

²⁹ Kángkáng bantông byiko [ba/chi ba-tíngê kyísí ba-fé ǎ.] Kángkáng banet ḿbé badakpú ba/chi ba-tíngê kyísí ba-fé ǎ. Kángkáng banet-bukyû ekpú ba/chi ba-tíngê kyísí ba-fé ǎ. [

³⁰ Ejíí nyí nyi e-bâ] e/chi e-chi ńkyí nyǐ o/sét. Banet ba/chi ba-pem ejíí nyí nyi e-bâ kyi-kim ne Óburúkpâbí.

³¹ Banet ba/chi ba-sét bwǎn ḿbé mbe ba-bâ ba/fu, Óburúkpâbí oo/nyii banet emen.