SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 21 - Bokyi Bible

Otu o/kpee Osówo ké Byití ekpógê

¹ Ô Óburúkpâbí, otu mu ké bunyîn-dyityém, ké nǎ, wo a/kye ǎ busa. Nyǐ mu o-jêe ng, ké nǎ, wo a/chi ǎ o-kpógê.

² Wo aa/kye ǎ ńkyí dyityém emen ndyi dyi-ryuu ng. Wo aa/bángê ké ńkyí nyǐ o/bí.

³ Wo a/bê a-kâm ǎ ne banjware ḿbé biǐtí, ne a/cít ǎ etam-butu ké dyishí nyí ba/chi ké gûl.

⁴ Nyǐ mu o-ryuu ng dyikpen, ne wo a/kye ǎ kándyí. Wo a/kye ǎ ńdyí dyitang ne ńdyí dyidarí.

⁵ Akpee emen a/rêe ké bubwô-ochwâp eyên. Wo aa/kye ǎ busa a-chi ǎ o-byí dyizîn.

⁶ Banjware eyên mbe ne nyǐ ne banyá, ne bushú eyên boo/sú ǎ ne bunyîn-dyityém.

⁷ Otu mu o-tî ng dyityém ké Óburúkpâbí mú o/rêe o-shwôm. Ké bubwô ḿbú kyijé ńkyí Óburúkpâbí ńkyí kii*man* chwǒm kyi*fí ńkyí kyi/chi kyi-náng ǎ nang nkéré orá.

⁸ Otu o/chi o-kám kángkáng banet-bushwôn emen. O/chi o-kám nang yeě mú nyǐ mu o-sa ng ǎ kafâ.

⁹ Nyǐ o/chi o-man ne mbé wǎ okwâ mú mu o-mang ng ké nkéré nyǐ oo/ribi. Óburúkpâbí o/chi o-myii kámbé ké kafâ esa emen, ne okwâ o/chi o-ryí kámbé.

¹⁰ Wǎn ebe nang obónge oo*ba/chi o-kpen*. [Otu] o/chi o-ju kámbé kángkáng.

¹¹ Mbé mbe ba-kabe ng ekabe kyi-kim ne nyǐ, ba-nam ǎ dyiju. Nké mbé baa*ba/chi ba-ri bukwóp*.

¹² Nyǐ o/chi o-ché kámbé abán emen, ne mbé ba/chi ba-pín esim ba-ribi ne ochéé.

¹³ Óburúkpâbí, be byimu byi-kpee ng ǒ ké kiǐtí-busa eyên. Be byi/chi byi-kwán ekwan byi-kpee busa eyên.