SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 20 - Bokyi Bible

Nshwam-Byití ekpógê

¹ Kyi/bát Óburúkpâbí ofaa ǒ ojá ké nkéré amu ké afaníkong. Kyi/bát Osówo mú Jekôp oku ǒ.

² Kyi/bát otwóm ǒ ochwâp mú mu o-fím m ké kiǐtí-kyise-kyifen emen echi, o-kye ǒ ochwâp mú mu o-fím m ké kaku ńké Záyon.

³ Kyi/bát okoo kángkáng eyáré eyên, ne dyityém dyinyîn ǎ ne kángkáng byifen eyên.

⁴ Kyi/bát okye ǒ ńkyí amu a-ryuu ng, ne ochi kángkáng ekabe eyên e-ca kashú.

⁵ Be kâng byi/chi byi-jêe ne ejá kyíbóng kyíbóng kyi-kim ne byití eyên ḿbyí a/kpógê, ne byi-tông ekap-bunyîn-dyityém ké byití eyên ekpógê ké akpee byi-kye Osówo eten. Kyi/bát Óburúkpâbí ofaa ǒ ojá ké kángkáng ḿbyí amu a-bí ng.

⁶ Kántîk, me mu n-nyît ng n/fu, Óburúkpâbí mu o-chi i otu emen mú nyǐ o/cá o-kpógê. Nyǐ mu o-faa ng ǎ ojá kyi-fím ké bubóng emen ḿbú ociring, ne ké busa emen mu o-chi i ǎ o-kpógê byití ḿbyí byiryên.

⁷ Banet bakíri ba/tî dyityém ké bamútu-byití ebe, ne bakíri ba/tî dyityém ké bubyî-orá ebe. Nké be byi/tî dyityém ké busa ḿbú Osówo Óburúkpâbí eten.

⁸ Azong-banet ányi ba/chi ba-kpán ba-myii, nké be byi/chi byi-bûu byi-bwom shwaneshwane.

⁹ Ô Óburúkpâbí, chi otu eyên o-kpógê, [a-faa] bě ojá ké nkéré bii/kó ǒ.