SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 2 - Bokyi Bible

Otu mú Osówo o/cá

¹ Ebóng ńkyí banet ḿbé baa*nyît Osówo* mbe ba-nam m bunwa. Ebóng ńkyí banet ḿbén mbe ne byibî-ekabe ḿbyí byi*da/byí chwǒm*.

² Batu ebe ne banet-ashí ebe cibicibi ba-bírî ng bunwa ne Óburúkpâbí ne otu emen mú nyǐ o/cá.

³ Ba-raa ng ba/fu, bâ n̂g byi-firi ké byiko eten. Bâ n̂g byi-né busa ebe.

⁴ Óburúkpâbí mu me ké kakyúng-butu emen ńké kyíbóng, mu me o-jwó ng ojwóng kámbé.

⁵ Óburúkpâbí o-raa ne mbé kâng ké dyityém-busa o-chi bushî bu-róng kámbé ké dyityém emen esa.

⁶ O-raa o/fu, nyín otu mú ejí mú me n/cá n-tî ké kaku-ociring ejí ńké badakó Záyon.

⁷ Otu o-raa o/fu, mîng mě n-sét ńkyí Óburúkpâbí o/fu. Óburúkpâbí oo/sét mě o/fu, wo a-chi i wǎn ejí, kurún, me n/firi bonchí eyên.

⁸ Bí mě, ne me n/chi n-kye ǒ kángkáng eshê nyí ké ejíí. Ejíí emúmú e/chi e-firi nyí eyên.

⁹ Wo a/chi a-kyú kámbé otu ne kachí ké dyikwâ. Wo a/chi a-sé kámbé ashí byicê byicê wǎ butí.

¹⁰ Ké bubwô ámbu kâng, ǎ batu ne banet-ashí, fwôo n̂g atông kanong kanong ba-jwo ekó nyí mu n-kuri ng běn.

^11-12 Chi n̂g ne bushî ńkyí Óburúkpâbí o/sét. [Ba-tíngê kyísí ba-fé ǎ ne banê ké byiko.] Â kyi*fí éné* nyǐ kyi/chi kyi-sa ǎ, ne ben ba/chi ba-kpú. Ké nǎ, kafâ emen kaa*sóng ǎ ebírî*. Bunyîn-dyityém mbu ne banet ḿbé mbe ba-rem m ké busi emen.