SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 19 - Bokyi Bible

Butu mbu ké Byěm ḿbyí Osówo o/chi

¹ Bubóng mbu bu-tông ng butu ḿbú Osówo wááng. Mbu bu-tông ng bǎmkpóngé ḿbé Osówo oo/chi.

² Dyicí nang dyirá ndyi dyi-sét ng orî-dyicí kyi-kim ne bǎmkpóngé ámbe. Buchú nang burá mbu bu-pem m ne orî-buchú kyi-kim ne mbé.

³ Nang ojá nang kyiraa aa*jwo*. Nang kyicoge aa*jwo*.

⁴ Nké [ejá] ebe nyi e-ta ng ejíí emúmú. Kyitwóm ebe nkyi kyi-ribi ng nang nyá. Osówo o/bi kyise ké bubóng o-tî óbyísû.

⁵ Óbyísû mu o-byí i o-bâ wǎ onyinchéng mú mu o-dim m dyibé ebé, ne wǎ nzónge ochéé mú mu o-ryuu ng ochéé ekan.

⁶ Óbyísû mu o-byí i ké bukô-bubóng bubónge o-cen o-ribi ké ḿbú áku. Kiinsóngé emen kyi-ta ng kángkáng byěm.

Byije ḿbyí Óburúkpâbí

⁷ Byije ḿbyí Óburúkpâbí byi/nwa kerededet. Mbyi byi-kyâ dyikpen ńdyí dyifyîfî. Byije ḿbyí Óburúkpâbí byi/kwárê ḿbyí onet odafé dyityém ké mbyí. Banet ḿbé ba*fí ne bubong* mbe ba-já ng bubong ké mbyí.

⁸ Byije ḿbyí Óburúkpâbí mbyi ntûntû. Banet ḿbé mbe ba-tî ng kámbyí mbe ké bunyîn-dyityém. Byije ḿbyí Óburúkpâbí bii*ryí acît*. Mbyí byi-bâ ne buwángé.

⁹ Ofê mú badakye Óburúkpâbí mu kanong. Mu o-waa ng ne banyá. Óburúkpâbí oo*ryí acît ké mpan emen*. Nyǐ kángkáng nkéré o-sét ng ntûntû.

¹⁰ Byije emen byi-nyîn n byi-shwôm nang ebóng akpuga. Mbyí byi-nyîn n byi-shwôm bakút-bukwan nang mbe cángénéné nǎ!

¹¹ Óburúkpâbí, byije eyên nké mbyi byi-kyâ mě mú ḿgbán eyên byinyídíng. Wo amu a-kyâ mě biǐtí-byěm, ké nǎ, me mu n-tî ng kámbyí.

¹² Óburúkpâbí, yeě odanyît ńkyí nyǐ o*da/man echi*. Nyii mě ké byibî ejí ḿbyí byi*fí wááng*.

¹³ *Dachi a-mîng mě to n-tigi ne dyityém ejí n-chi byibî*. *Damîng kámbyí byi-koo mě busa*. Ne me n/chi n-firi kerededet, a-chi mě n-fem ké [byibî ḿbyí bii*nwa eri*.]

¹⁴ Kyi/bát ejá ejí ne okabe ejí byikwárê ḿbyí wo adakoo, ǎ Óburúkpâbí, mú Onet-Obâm ejí ne Onet-Onyii ejí.