SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 18 - Bokyi Bible

Okwan mú Otu Dívit o/kwán ké Byití ḿbyí o/kpógê

¹ Óburúkpâbí, wo amu a-jê ng mě kanong kanong. Wo nké amu onet mú mu o-ku ng mě.

² Óburúkpâbí nké mu Onet-Onyii ejí. Nyǐ nké mu kyikit-dyirem ejí ńkyí shwaneshwane. Osówo ejí nké mu Onet-Onyii ejí, ne â mu ne nyǐ, chwǒm kii*chi mě*. Nyǐ mu o-ku ng mě wǎ kiinku byiko. Nyǐ mu o-ku ng mě ne mu o-tî ng mě eringe nyí chwǒm kii*ta mě*.

³ Me mu n-kó ng Óburúkpâbí, ne nyǐ mu o-nyii ng mě ké abwô nyí banet-bushwôn ejí. Kye n̂g Óburúkpâbí akpee.

⁴ Ofene-bukyû o/mû o/wâng mě. Kace-bukyû ka/wâng mě ka-fé ké otyém.

⁵ Ofene-bukyû o/mû oo/wâng mě, ne dyikun dyi/mû dii/kuu kaǎtám ńké ndaróng.

⁶ Me n/kó Óburúkpâbí ké nkéré afaníkong ejí. Me n/kó Osówo ejí n/fu, ochwáp mě. Nyǐ o/jwo ejá ejí ké kiǐtí-kyise-kyifen emen echi. Nyǐ o/fwôo atông ké bukyû ejí ḿbú mu n-tii ng n/fu, ochwáp mě.

⁷ Ne esí kâng e-náng. Byikû-eku byi-náng, ké nǎ, Osówo o/sa kafâ.

⁸ Arúkwâ a-byí ǎ ké éfâ-nzóng, bumang-okwâ ne amánge-okwâ a-byí ǎ ké ocím.

⁹ Nyǐ o-ját bubóng, o-bâ kyísí ne kiipyimpyam-ófíbí ké byiká.

¹⁰ Nyǐ o-byí ochéé óchee ké kiǐnyám ńkyí nkyi ne abyibabang. O/cen ké abyibabang nyí bufú.

¹¹ Nyǐ o-cít kyifip ké byiko. Bubóng ḿbú boo/jîi pyampyam bu/wâng ǎ.

¹² Abíp ne bamang-okwâ byi/fím ké kasabang ńké nke ǎ ké bushú ne byi-byí ké biimpyimpyam-ófíbí.

¹³ Óburúkpâbí kâng o-rime kyíbóng wǎ omu ne [ba-jwo] ejá nyí Osówo mú kyíbóng kyíbóng.

¹⁴ Nyǐ o-ché banet-bushwôn emen abán, o-chi kámbé ba-firi byiryibyiryi. Nyǐ o-chi kámbé ba-ribi ne ochéé ké kasabang ńké mu o-két ng.

¹⁵ Óburúkpâbí, ké nkéré a/raa ké kafâ esa ne banet-bushwôn eyên a-nyán kámbé, baya ḿbé baryên ba-núng ne byikwap-esí byi-waa kyíjí.

¹⁶ Óburúkpâbí o/bwom kyíbóng o-tan bubwô o-níbî mě. Nyǐ o/tut mě m-byí ké kiǐríbíríbí-baya.

¹⁷ Nyǐ o/nyii mě ké abwô nyí banet-bushwôn ejí ḿbé mbe ne busa, ne ké abwô nyí kángkáng banet ḿbé mu n-sa ng kámbé kafâ. Mbé ba/mû ba/shwôm mě busa.

¹⁸ Mbé ba/rim bunwa ne me ké nkéré m/mû ké afaníkong. Nké Óburúkpâbí o/ku mě.

¹⁹ Nyǐ o/chwáp mě n-fem ké ofene. Nyǐ o/nyii mě, ké nǎ, kyi/mû kyi-nyîn n ǎ ne me.

²⁰ Óburúkpâbí mu o-yárê ng mě, ké nǎ, me mu n-chi i ńkyí nkyi kanong. Nyǐ mu o-jware ng mě, ké nǎ, me n*da/chi kyibî*.

²¹ Me nn/chi wǎ eringe nyí byije ḿbyí Óburúkpâbí byi/sét. Me n*da/bírî ne Osówo esim*.

²² Me nn/tî kángkáng byije emen. Me n*da/né ne echi eringe nyí byi/sét*.

²³ Nyǐ mu o-nyît ng o/fu, me n*fí ne kyibî* ne me nn/tî byiko ejí cát ké byibî echi.

²⁴ Ne ké bubwô ámbu, nyǐ mu o-yárê ng mě, ké nǎ, me mu n-chi i ńkyí nkyi kanong, ké nǎ, nyǐ mu o-nyît ng o/fu, me n*da/chi kyibî*.

²⁵ Ô Óburúkpâbí, wo amu a-fâ dyityém eyên ne banet ḿbé mbe ba-fâ atyém ebe ne wo. Wo amu kanong kerededet ne banet ḿbé ba/kwárê.

²⁶ Wo amu dyityém kpárám ne banet ḿbé mbe dyityém kpárám ne wo. Nké wo amu a-chi i bambên dyityém [byibî-byěm.]

²⁷ Wo amu a-nyii ng banet ḿbé mbe ba-tî ng byiko ebe kyísí. Nké wo amu a-shû ng bantông byiko a-tî kyísí.

²⁸ Ô Óburúkpâbí, wo amu a-kyâ mě kiinwángé a-chi i kyifip ejí kyi-man.

²⁹ Wo amu a-kyâ mě busa ḿbú ndanwa ne banet-bushwôn ejí ne busa ḿbú ndayú ekpe-oshê ebe.

³⁰ Byěm ḿbyí Osówo ejí mu o-chi i mbyi kerededet kanong kanong. Onet o-man n ejêem esim ké byiraa emen kanong kanong. Nyǐ mu wǎ édem nyí kángkáng banet ḿbé mbe ba-ryuu ng oku emen.

³¹ Óburúkpâbí kǎnchí nké mu Osówo. Osówo kǎnchí nké mu kiinku eten.

³² Nyǐ nké mu Osówo mú mu o-chi i mě n-shwane. Nyǐ mu o-chi i kiǐfáng ejí kanong.

³³ Nyǐ mu o-chi i etyém-abe-byiká ejí e-shwane wǎ nyí enyam. Nyǐ o*fí o-bángê e kyibî kyi-ta mě kyíbóng-eku*.

³⁴ Nyǐ mu o-tángê e mě byití enwa eringe nyí me ndaman esep búre ḿbú shwaneshwane.

³⁵ Ô Óburúkpâbí, wo amu a-ku ng mě ne amu a-nyii ng mě. [Otûn] eyên mú amu a-tún n mě oo/chi mě n-firi kiǐtí, ne busa eyên boo/tî mě kanong.

³⁶ Wo aa/tî mě eringe nyí baa*kám mě* ne me n*da/róng ne*.

³⁷ Me mu n-zóngê e ne banet-bushwôn ejí n-kám m kámbé. Mm*mîng* tete n-ju kámbé.

³⁸ Me mu n-díp ng kámbé m-pwó ng kyísí ba-myii ké byiká ejí baa*man to ebûu*.

³⁹ Ké nǎ, wo amu a-kyâ mě busa ḿbú byití enwa, ne ḿbú mu m-kpógê ng banet-bushwôn ejí.

⁴⁰ Wo amu a-chi i banet-bushwôn ejí ba-chêe mě. Me mu m-man n ne banet ḿbé mu n-sa ng kámbé kafâ.

⁴¹ Mbé mbe ba-tii ng ba/fu, bachwáp kámbé, nké onet o*fí mú mu o-chwáp ng kámbé*. Mbé mbe ba-kó ng Óburúkpâbí, nké nyǐ o*fí o-faa ng kámbé ojá*.

⁴² Me mu n-shiryi ng kámbé ba-firi wǎ édúkǎndú nyí bufú mbu bu-tugi ng bu-pwó ng. Me mu n-cím m kámbé wǎ biǐntóng ḿbyí mbyi ké byiká-oshê.

⁴³ Wo a/nyii mě ké abwô nyí banet ḿbé ba/bírî bunwa ne me, ne a/chi mě n-firi onet-dyishí mú eshê. Banet ḿbé nn*nyît kámbé* kántîk ba/firi banet ejí.

⁴⁴ Bacinbánet ba-tíngê e kyísí ké bushú ejí. Mbé ba/chi ńkyí n/sét ké nkéré ba/jwo kyi-kim ne me.

⁴⁵ Asa a/man kámbé ne ba-byí ké kyikit-orem ebe ba-bâ ne banê ké byiko.

⁴⁶ Óburúkpâbí mu okpó. Kye n̂g onet mú mu o-ku ng mě akpee. Sét n̂g eringe nyí Osówo mú mu o-nyii ng mě o/rêe.

⁴⁷ Nyǐ mu o-chi i mě m-kpógê banet-bushwôn ejí. Nyǐ mu o-shû ng eshê kyísí e-firi ké bubwô ejí.

⁴⁸ Ne mu o-nyii ng mě ké abwô nyí banet-bushwôn ejí. Ô Óburúkpâbí, wo a-chi i mě m-kpógê banet-bushwôn ejí, a-nyii mě ké abwô nyí banwa anwa.

⁴⁹ Ké bubwô ḿbún nké me mu n-kyâ ǒ akpee ké eshê. Me mu n-kwán n ekwan-akpee n-kyâ ǒ.

⁵⁰ Osówo mu o-chi i otu emen o-kpógê byití ḿbyí biǐtí. Nyǐ mu o-tông ng Otu Dívit mú nyǐ oo/cá ne bwǎn emen kyijé emen ńkyí kii*man ne banyá*.