SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 17 - Bokyi Bible

Nshwam mú Onet mú o*da/chi Chwǒm*

¹ Ô Óburúkpâbí, fwôo atông a-jwo arông nyí mu n-tîm m n/fu, pan mě mpan mú aa*ryí acît*. Tî atông a-jwo bukyû ejí ḿbú mu n-tii ng n/fu, chwáp mě. Fwôo atông a-jwo nshwam ejí mú ntûntû.

² Wo a/chi a-pan mpan o-nwa mě, ké nǎ, wo amu a-nyît ng ńkyí nkyi ntûntû.

³ Wo amu a-nyît ng dyityém ejí. Wo aa/bê a-kâm mě ne buchú. Wo aa/kpúrî mě kángkáng a*da/ri kyibî-okabe nang obónge ké dyityém ejí*.

⁴ Me nn*raa kyibî wǎ eringe nyí banet ḿbé áku mbe ba-raa ng*. Me nn/chi eringe nyí wo a/sét. Me n*da/cen ké akwóp nyí byibî echi*.

⁵ Me kángkáng nkéré nn/cen ké bukwóp eyên ne n*da/mim ne ké mbú*.

⁶ Ô Osówo, me mu n-fâ nshwam n-kyâ ǒ, ké nǎ, wo amu a-faa ng mě ojá. Ké bubwô ámbu, bírî a-kâm mě a-jwo ejá ejí.

⁷ Tông bě kiǐtí-kyijé eyên wááng a-nyii bě. Be byi-fem m ké bukô-kyikpút eyên ké abwô nyí banet-bushwôn eten.

⁸ Ku mě wǎ eringe nyí wo adaku achi nyí eyên wo oyén. Rôo mě ké kiǐríribí-abyibabang eyên,

⁹ n-fem ké bunwa ḿbú bambên atyém ba/rim ne me. Byibî-banet-bushwôn ba/wâng mě.

¹⁰ Baa*ri onet bafip* ne mbé mbe ba-raa ng ké byiko etông.

¹¹ Mbe mě wângwâng kántîk nang m/bírî nyá. Mbé mbe ba-bám m mpât mú mbé bada mě etut ba-twóp kyísí.

¹² Mbé mbe ba-bám m mě wǎ ekpang, ba-ryuu ng ba/fu, mbé ba-ját ng mě boǒcê boǒcê.

¹³ Óburúkpâbí, bâ. Bwom bunwa ne banet-bushwôn ejí a-kpógê kámbé. Yip kashwám eyên a-nyii mě ké abwô nyí bambên atyém.

¹⁴ Nyii mě ké abwô nyí banet ḿbé mbe ne kángkáng ḿbyí mbé mbe ba-ryuu ng ké dyikpen ńdyín. Kye kámbé busông ké afaníkong nyí a/tî kámbé. Kyi/bát afaníkong ányi awaa nyí adakwárê bwǎn ebe, kyicê kyi-waa nyí bwǎn-bwǎn ebe.

¹⁵ Nké me n/chi n-ri ǒ, ké nǎ, me n*da/chi kyibî nang kyibónge* ne ké nkéré nn/jwóbê, bushú eyên bu-sú u mě ne bunyîn-dyityém.