SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 149 - Bokyi Bible

Okwan-Akpee

¹ Kye n̂g Óburúkpâbí akpee. Kwán n̂ okwan mú ofyîfî ba-kye Óburúkpâbí. Kye n̂g ǎ akpee ké burwám-banet emen ḿbé ba/fé dyityém ne nyǐ.

² Ézerel, kyú ké bunyîn-dyityém ké bubwô ḿbú nyǐ mú o/mee ǒ. Banet ḿbé Záyon, jêe n̂g ké bubwô-Otu emen.

³ Kye n̂g dyizîn emen akpee ké ane ene. Kim m̂ ekam ne ácîng ké akpee ba-kye ǎ.

⁴ Óburúkpâbí mu ké bunyîn-dyityém ne banet emen. Nyǐ mu o-kyâ banet ḿbé mbe degere ofê ké byití ekpógê.

⁵ Banet ḿbé Osówo, jêe n̂g ké dyikpóge ńdyí ba/kpógê, ba-kwán ekwan buchú bumúmú ké bunyîn-dyityém.

⁶ Bakye Osówo akpee ne ejá kyíbóng kyíbóng ne biininen-bushwám ebe ké abwô,

⁷ ḿbú badakpógê eshê nyí ee*nyît Osówo* ba-kye banet ámbe busông,

⁸ ba-fé batu ebe ne banet-ashí ebe bamgbokobá-biǐré,

⁹ ba-kye eshê ányi busông wǎ eringe nyí Osówo o/kye busa. Nyín něen dyikpóge ńdyí banet-Osówo ba/kpógê. Kye n̂g Óburúkpâbí akpee.