SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 148 - Bokyi Bible

Ejíí Emúmú ekpee Osówo

¹ Kye n̂g Óburúkpâbí akpee. Ben mú bamu ba-kyú u kyíbóng kyíbóng, kye n̂g Óburúkpâbí akpee.

² Kángkáng barím emen ḿbé banong ne kángkáng bannwa byití emen ḿbé kyíbóng, kye n̂g ǎ akpee.

³ Óbyísû ne otukáku, kye n̂g ǎ akpee. Ékpére nyí nyi e-san n, kye n̂g ǎ akpee.

⁴ Bubóng ḿbú bu/nyâam bu-shwôm ne baǎmú ḿbé mbe kyíbóng-bubóng, kye n̂g ǎ akpee.

⁵ Kyi/bát mbyí kángkáng byikye dyizîn ńdyí Óburúkpâbí akpee. Nyǐ o/kye busa ne o-mee kámbyí. [

⁶ Ké busa emen nké o/tî kámbyí ké byikit ebe ne banyá, ne mbyí bii*man ené echi ńkyí nyǐ o/fu, byichi*.]

⁷ Kángkáng biǐríbíríbí-baya ḿbé baryên, ne biǐnyám-baya,

⁸ ne afú nyí shwaneshwane nyí nyi a-chi i ńkyí nyǐ o/sét, ne ófíbí, ne abíp, ne kasabang, ḿbyí mbyi ké ejíí, kye n̂g Óburúkpâbí akpee.

⁹ Ecím-eku ne eku nyí eryên ne byichí ne byizinge

¹⁰ ne kángkáng enyam nyí byise ne nyí dyikán, bunurung ne efyi, kye n̂g Óburúkpâbí akpee.

¹¹ Batu ne kángkáng banet ne bwǎn-batu ne kángkáng batu-ashí ḿbé áku

¹² ne bwǎn-banyinyi ne byisu-banyinchéng ne bakínkán-banet ne bwǎsíng, kye n̂g Óburúkpâbí akpee.

¹³ Kyi/bát mbé kángkáng bakye dyizîn ńdyí Óburúkpâbí akpee. Dyizîn emen dyi/rêe dyi-shwôm kángkáng azîn nyí áku. Busan emen ḿbú ragerage bu/rêe bu-shwôm bubóng ne esí.

¹⁴ Nyǐ o/chi banet-Ézerel ḿbé oshê emen, ḿbé mbe ǎ ké dyityém ba-shwane eringe nyí kángkáng banet emen bada ǎ ekye akpee. Kye n̂g Óburúkpâbí akpee.