SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 147 - Bokyi Bible

Kye n̂g Osówo mú o/rêe o-shwôm Akpee

¹ Kye n̂g Óburúkpâbí akpee. Nkyi kanong ńkyí badakwán ekwan-akpee ba-kye Osówo eten. Nkyi ne bunyîn ne kyi/nwa ńkyí bada ǎ ekye akpee.

² Óburúkpâbí mu o-bwât ng Jerúsélem. Nyǐ mu o-bwa ng esim ne banet ḿbé ba/kám ba-dim ne mbé wǎ básóng.

³ Nyǐ mu o-chi i banet ḿbé atyém ebe a*fí a-nyîn n kámbé* ba-nyange, o-bwá ng byibáp ebe.

⁴ Nyǐ oo/tî ocím mú ékpére edakyú, ne mu o-kó ng nang orá ké dyizîn.

⁵ Óburúkpâbí eten mu kiǐtí ne o/rêe. Bubong emen boo*nwa ekan*.

⁶ Nyǐ mu o-bêem m banet ḿbé mbe degere kyíbóng. Nké mu o-shiryi ng bambên atyém o-fé [kyísí.]

⁷ Kwán n̂ ekwan-akpee ba-kye Óburúkpâbí. Kim m̂ ane ké dyícîng ba-kye Osówo eten.

⁸ Nyǐ mu o-chi i bubóng bumúmú bu-jîi, o-kyâ esí omu, ne mu o-chi i biǐbyâa byi-kán n ké eku.

⁹ Nyǐ mu o-kyâ enyam byiryíng, ne mu o-nen n bwǎn-bunurung ké nkéré bu-kú bu-kó ng ǎ.

¹⁰ Bunyîn-dyityém emen bu*fí ké bubyî-orá ḿbú mbu ne busa* nang ké basúja ḿbé mbe ba-kán n byití*.

¹¹ Nké bunyîn-dyityém mbu ǎ ne banet ḿbé mbe ba-kyâ ǎ ofê ne ḿbé mbe ba-tî ng dyityém ké kyijé emen ńkyí kii*man*.

¹² Ô Jerúsélem, kyi Óburúkpâbí akpee. Ô Záyon, kye Osówo eyên akpee.

¹³ Nyǐ mu o-tî ng ecím-afyi eyên shwanshwan. Mu o-jware ng banet eyên.

¹⁴ Nyǐ mu o-tî ng bati-esí enen kanong, ne mu o-kyâ běn esang-byichí nyí e/nwa e-shwôm e-kwárê běn.

¹⁵ Nyǐ mu o-nyán n esí, ne e-chi babap ńkyí nyǐ mu o-sét ng.

¹⁶ Nyǐ mu o-tát ng abíp wǎ kiǐmbim, ne mu o-pwó ng kyibû byiryibyiryi wǎ édúkǎndú.

¹⁷ Nyǐ mu o-chi i abíp a-róng wǎ byirim-aká. Onet o*fí mú odaman ecíp dyibyi ńdyí nyǐ mu o-chi i*.

¹⁸ Nyǐ mu o-kyâ busa kâng abíp a-nyange, o-chi bufú bu-tugi, omu o-kpet esen.

¹⁹ Nyǐ mu o-sét ng banet emen byiraa, o-kyâ Ézerel byije o-sét kámbé ńkyí badachi.

²⁰ Nyǐ o*da/chi ne ńkyín o-kye eshê ekíri*. Ee*nyît byije emen*. Kye n̂g Óburúkpâbí akpee.