SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 146 - Bokyi Bible

Kye n̂g Osówo Onet-Onyii Akpee

¹ Kye n̂g Óburúkpâbí akpee. Kyirim ejí, kye Óburúkpâbí akpee.

² Me n-kyâ ǎ akpee tete n*fí to okpó*. Me n-kwán n ekwan n-kye Osówo ejí kángkáng dyikpen ejí.

³ *Datî dyityém eyên ne banet ḿbé mbe banet-ashí*. Onet oo*man ǒ enyii*.

⁴ Ké nkéré mbé baa/kpú, ba-bwa ng ké ecing. Ké dyicí ándyi, kángkáng byěm ebe ḿbyí mbe ba-nam m byi-man.

⁵ Bunyîn-dyityém mbu ne onet mú mu ne Osówo-Jekôp mú oda ǎ echwáp. Mbu to ne onet mú mu o-jêem m esim ké Osówo Óburúkpâbí emen,

⁶ mú mu nchi bubóng ne esí ne baya ḿbé baryên ne kángkáng byěm ḿbyí mbyi ké mbyí. Nyǐ kángkáng nkéré mu o-tî ng ocím emen mú mu o-ryí i.

⁷ Nyǐ mu o-két ng mpan o-nwa banet ḿbé banet mbe ba-cít ng kámbé, ne mu o-kyâ banet ḿbé esong nyi e-nwa ng kámbé byiryíng. Óburúkpâbí mu o-fîm m banet-mgbokobá ba-byí ké mgbokobá,

⁸ ne mu o-chi i banet ḿbé ba*fí ba-rángê e* ba-kûrángê. Nyǐ mu o-bêem m banet ḿbé baa/myii. Banet emen ḿbé mbe ba-chi i kanong ba-jê ng ǎ.

⁹ Nyǐ mu o-bám m bacinbánet ḿbé mbe ké esí eten. Nyǐ mu o-chwáp ng banyǐnkú ne bwǎn-byibén. Nké mu o-bên n byěm ḿbyí bambên dyityém mbe ba-nam m.

¹⁰ Óburúkpâbí mu Otu mú ne banyá. Ô Záyon, Osówo eyên okyú Otu kángkáng nkéré. Kye n̂g Óburúkpâbí akpee.