SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 145 - Bokyi Bible

Okwan-Akpee

¹ Osówo ejí ne Otu ejí, me n/chi n-sét kyi-kim ne eringe nyí a/rêe a-shwôm. Me n/chi n-kó ǒ asǎma ne banyá ne banyá.

² Me n/chi n-kó ǒ asǎma kángkáng dyicí. Me n/chi n-kó ǒ asǎma ne banyá ne banyá.

³ Óburúkpâbí o/rêe, ne ba-man ba-kye ǎ akpee kanong kanong. Nyǐ o/rêe o-shwôm chwǒm ńkyí bubong budanyît.

⁴ Ba/chi ba-kpee ǒ ké ńkyí wo aa/chi kyi-fím ké kyikû-bwǎn kyibónge tete a-ribi nnyinyěng. Mbé ba/chi ba-sét kyi-kim ne biǐtí-byěm eyên ḿbyí amu a-chi i.

⁵ Mbé ba/chi ba-sét kyi-kim ne busan eyên ḿbú ragerage ne eringe nyí wo a/rêe, ne me n/chi n-kûkabe kyi-kim ne biǐtí-byěm eyên ḿbyí amu a-chi i.

⁶ Banet ba/chi ba-sét kyi-kim ne biǐtí-byěm eyên ḿbyí amu a-chi i, ne me n/chi n-sét eringe nyí wo a/rêe.

⁷ Ba/chi ba-sét kyi-kim ne kanong eyên kángkáng, ne ba/chi ba-kwán kyi-kim ne dyityém eyên ńdyí a/cángê.

⁸ Óburúkpâbí mu o-tông ng kyijé, ne mu o-ri ng banet bafip. Nyǐ oo*sa kafâ babap* ne mu ne kyijé pwat ké byiko ńkyí kii*man*.

⁹ Nyǐ mu kanong ne kángkáng banet, ne byiko byi-kpú u ǎ ne kángkáng byěm ḿbyí nyǐ o/chi.

¹⁰ Óburúkpâbí, kángkáng byěm eyên ḿbyí wo a/chi byi/chi byi-kye ǒ akpee, ne kángkáng banet eyên ba/chi ba-kó ǒ asǎma.

¹¹ Mbé ba/chi ba-sét kyi-kim ne busan eyên ḿbú ragerage ḿbú butu eyên, ne ba/chi ba-sét eringe nyí wo a/rêe,

¹² eringe nyí nang yeě o/chi o-nyît kyi-kim ne biǐtí-byěm eyên ḿbyí amu a-chi i, ne kyi-kim ne kiǐtí-busan ḿbú ragerage ḿbú butu eyên.

¹³ Butu eyên mbu ne banyá, ne wo amu Otu ne banyá. Óburúkpâbí mu o-tî ng ocím emen mú nyǐ mu o-ryí i, ne kángkáng byěm ḿbyí nyǐ mu o-chi i mbyi kanong.

¹⁴ Nyǐ mu o-nyii ng banet ḿbé mbe ké afaníkong. Nyǐ mu o-bêem m banet ḿbé baa/róng.

¹⁵ Kángkáng byěm ḿbyí mbyi byi-kpen n mbyi byi-tî ng achi ké wo, ne wo amu a-kyâ kámbyí byiryíng ké nkéré mbyí byi-kú byi-ryuu ng kámbyí.

¹⁶ Wo amu a-kyâ byi-kwárê kámbyí eringe mbyí kángkáng byidazût.

¹⁷ Óburúkpâbí mu o-chi i kanong ké kángkáng byěm ḿbyí nyǐ mu o-chi i. Ne mu o-ri ng banet bafip ké kángkáng édúú emen.

¹⁸ Nyǐ mu fáráng ne banet ḿbé mbe ba-kó ng ǎ ne dyityém ebe.

¹⁹ Nyǐ mu o-kyâ banet ḿbé mbe ba-kyâ ǎ ofê byěm ḿbyí mbé mbe ba-ryuu ng. Nyǐ mu o-jwo ng bukyû ebe, ne mu o-nyii ng kámbé.

²⁰ Nyǐ mu o-ku ng nang yeě mú nyǐ mu o-jê ng ǎ. Nké nyǐ o/chi o-ju bambên atyém.

²¹ Me n/chi n-kye Óburúkpâbí akpee kángkáng nkéré. Kyi/bát kángkáng byěm ḿbyí nyǐ o/chi byikpee dyizîn emen ńdyí dyinong ne banyá.