SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 139 - Bokyi Bible

Eringe nyí Osówo odatún Banet ne Byinyídíng Emen

¹ Óburúkpâbí, wo aa/pet mě a-ri, ne wo amu a-nyît ng mě.

² Wo amu a-nyît ng kángkáng byěm ḿbyí me mu n-chi i. Nang a/waa tete, a-nyît ng kángkáng okabe ejí.

³ Wo amu a-ri ng mě. Nang me mu n-chi i bǎmkpóngé nang mu n-jáng ng, wo amu a-nyît ng kángkáng ńkyí mu n-chi i.

⁴ Nang ne me n-kûraa, wo aa/nyît kpáá ńkyí me n/chi n-raa.

⁵ Wo amu mě byicê byimúmú. Wo amu a-ku ng mě ne busa eyên.

⁶ Onyît eyên mú amu a-nyît ng mě o/tíbî o-shwôm bubong ejí.

⁷ Me n-jâ nyá ne n-fem ké abwô eyên. Nyá nké me ndaman echêe ké bushú eyên.

⁸ Â me n/ce ké bubóng, wo amu áku. Â me n/rí sáre ké oshê-bakúsí, wo amu áku.

⁹ Â me m/byí wǎ kanurung n-shwôm kyicê ńkyí óbyísû mu o-byí i, nang n-kyú ké kyikit ńkyí kyi/tíbî kyi-shwôm ké kyicê ńkyí óbyísû mu o-ríbî ng,

¹⁰ wo amu áku mú ada mě etông bukwóp, wo amu áku mú ada mě echwáp.

¹¹ Â me m-man n esét kyifip n/fu, kyirôo mě, nang kiinwángé ńkyí kyi/wâng mě n/fu, kyiyángê kyi-firi buchú,

¹² nké nang kyifip kyi*fí ǒ kyifip* ne buchú mbu ǒ kpárám wǎ esû. Kyifip ne kiinwángé mbyi ǒ eringe ebónge.

¹³ Wo nké a/mee kángkáng byipang-enyam-byiko ejí. Wo nké a/cibi mě kángkáng byipang-enyam-byiko ejí ké dyifít-boné ejí.

¹⁴ Me mu m-kpee ng ǒ, ké nǎ, wo nké bada ǒ eshî. Kángkáng ḿbyí amu a-chi i mbyi ḿbyí ba*da/ri ne* ne byi/rêe kanong kanong. Me mu n-nyît ng kámbyí ne dyityém ejí kángkáng.

¹⁵ Wo a/nyît a/fu, me m/mû ányi ké nkéré amu a-chi i byikúú ejí, a-cibi ng kámbyí kanong kanong kyikit kyibónge ké [dyifít-boné ejí] ké nkéré m/mû n-kán n ányi ké kadip.

¹⁶ Wo a/ri mě ne ba-kû mě efwon. Wo a/sáng ací amúmú nyí a/kye mě ké nwet eyên ne mbwôp kashú-dyicí o-kpet.

¹⁷ Ô Osówo, [okabe eyên mu o-sóng ng mě ekyé.] Okabe eyên o/jê kanong kanong.

¹⁸ Mǔ o/jê o-shwôm éshíshě, â n/fu, m-pan n kámú. Me n/tôong ne wo [ké nkéré n/jwóbê.]

¹⁹ Ô Osówo, â a/ri eringe nyí me mu n-ryuu ng n/fu, ju banet ḿbé ba/bên atyém. Â a/ri eringe nyí me mu n-ryuu ng n/fu, banet-bakân bamîng mě kǎnchí.

²⁰ Mbé mbe ba-raa ng byibî-byiraa byi-kim ne wo. [Mbé mbe ba-raa ng byibî-byěm ba-bât ng dyizîn eyên.]

²¹ Ô Óburúkpâbí, â a/ri eringe nyí banet ḿbé wo amu a-sa ng kámbé kafâ mbe ba-sa ng mě kafâ. Â a/ri eringe me mu n-né ng banet ḿbé mbe ba-bírî ng bunwa ne wo.

²² Ba-sa ng mě kafâ ne dyityém ejí kángkáng. Me mu n-yip ng kámbé wǎ banet-bushwôn ejí.

²³ Ô Osówo, pet mě a-nyît dyityém ejí. Kan mě a-ri okabe ejí.

²⁴ Kyé a-ri â me mu nang ne kyibî kyibónge, a-tông mě [kiǐfáng ńkyí ne banyá.]