SÂM NNYINYĚNG-NWET KYI-KIM NE BYIRAA-BYINYÍDÍNG ḾBYÍ BANET-ÉZEREL 135 - Bokyi Bible

Okwan-Akpee

¹ Kye n̂g Óburúkpâbí akpee. Kye n̂g dyizîn emen akpee, ben bǎmgbán-Óburúkpâbí.

² Ben mú bamu ba-bwom m ké kyise ńkyí Óburúkpâbí ké kiǐtí-kyise-kyifen echi ńkyí Osówo eten.

³ Kye n̂g Óburúkpâbí akpee, ké nǎ, nyǐ mu kanong. Kwán n̂ ekwan-akpee ba-kye dyizîn emen, ké nǎ, [nyǐ o/cángê dyityém.]

⁴ Nyǐ o/cá Jekôp o-tî byiko emen, o-cá banet-Ézerel ba-kyú ḿbé emen.

⁵ Me mu n-nyît ng n/fu, Óburúkpâbí mú eten o/rêe. O/rêe o-shwôm kángkáng esówo.

⁶ Nyǐ mu o-chi i ńkyí mu o-ryuu ng ké bubóng ne esí ne ké biǐríbíríbí-baya ḿbé baryên.

⁷ Nyǐ nké mu o-chi i bubóng bumúmú bu-jîi. Nyǐ nké mu o-chi i kasabang ńké omu odana, ne mu o-fîm m bufú ké kyise emen o-bâ ne mbú.

⁸ Ké Éjip, nyǐ o/ju bambwôp kashú-bwǎn ḿbé banet ne ḿbé enyam.

⁹ Nyǐ o/chi biǐtí-akat eringe odakye otu ne kángkáng banet-bǎmkpóngé-otu busông.

¹⁰ Nyǐ o/bên eshê chwóó, ne o/ju batu ḿbé ba/mû ne busa.

¹¹ Batu wǎ Otu Síhon mú otu mú Ámon, ne Otu Ôok mú otu mú Báshan, ne kángkáng batu ḿbé Kínan.

¹² Nyǐ o/kúng esí ebe o-kye banet emen. O/kye banet-Ézerel kányí.

¹³ Óburúkpâbí, ba/chi ba-kûsét kángkáng nkéré ba/fu, wo a-chi i Osówo. Kángkáng byitông-banet byi/chi byi-kû ǒ ezîim.

¹⁴ Óburúkpâbí o/chi o-bám banet emen. Nyǐ o/chi o-ri bǎmgbán emen bafip.

¹⁵ Eshê nyí ee*nyît Óburúkpâbí* e-chi i erím-bakye nyí ebe ké syílyíba ne gûl. Banet nké ba/kúng abwô ne ba-chi kányí.

¹⁶ Nyi ne ecím, nké ee*man eraa*. Nyi ne achi, nké ee*man eri*.

¹⁷ Nyi ne atông, nké ee*man ejwo*. Nang kiǐnjáng ee*man eshû*. [

¹⁸ Kyi/bát kángkáng banet ḿbé ba/chi kányí ne ḿbé ba/tî dyityém ké nyǐ bafiri] wǎ erím-bakye ebe.

¹⁹ Banet-Ézerel, kye n̂g Óburúkpâbí akpee. Ben banchi kyifen ḿbé Osówo, kye n̂g ǎ akpee.

²⁰ Kyikû-banet ńkyí Lyíva, kye n̂g Óburúkpâbí akpee. Kángkáng banet ḿbé mbe ba-fâ ǎ, kye n̂g ǎ akpee.

²¹ Kye n̂g Óburúkpâbí akpee ké Záyon ne ké Jerúsélem mú mu oshê emen. Kye n̂g Óburúkpâbí akpee.